خیبر پختونخوامیں بڑے پیمانےپر اکھاڑپچھاڑ،چیف سیکرٹری سمیت15افسراوایس ڈی،4پولیس افسر بھی تبدیل

اسٹیبلشمنٹ ڈویژن کی جانب سے جاری الگ الگ نوٹیفکیشنز کے مطابق شہاب علی شاہ کو خیبر پختونخوا کے چیف سیکریٹری کے عہدے سے ہٹا کر فوری طور پر اسٹیبلشمنٹ ڈویژن رپورٹ کرنے کی ہدایت کی گئی ہے، جبکہ ڈاکٹر محمد فخر عالم عرفان کو صوبے کا نیا چیف سیکریٹری تعینات کر دیا گیا ہے۔

نوٹیفکیشن کے مطابق خیبر پختونخوا سے چار پولیس افسران کو اسلام آباد رپورٹ کرنے کا حکم دیا گیا ہے، جن میں گریڈ 20 کے ہمایوں مسعود سندھو، فصیح الدین اور عرفان طارق جبکہ گریڈ 18 کے عمران خان شامل ہیں۔

وفاقی حکومت نے چار نئے پولیس افسران کو بھی خیبر پختونخوا میں تعینات کیا ہے۔ ان میں پنجاب سے گریڈ 18 کے سعد آفریدی، بلوچستان سے اعتزاز عارف، اسلام آباد سے پری گل اور سندھ سے لیفٹیننٹ کمانڈر ریٹائرڈ کاشف آفتاب عباسی شامل ہیں۔

مزید برآں وزیراعظم آفس میں تعینات محمد یحییٰ خانزادہ کی خدمات خیبر پختونخوا حکومت کے سپرد کر دی گئی ہیں۔ پنجاب میں تعینات پاکستان ایڈمنسٹریٹو سروس کے خواجہ محمد سکندر ذیشان کو بھی خیبر پختونخوا میں تعینات کیا گیا ہے، جبکہ نیشنل انسٹی ٹیوٹ آف پبلک ایڈمنسٹریشن کوئٹہ سے میجر ریٹائرڈ اورنگزیب بدانی کا تبادلہ بھی صوبے میں کر دیا گیا ہے۔

اسٹیبلشمنٹ ڈویژن کے احکامات کے مطابق پاکستان ایڈمنسٹریٹو سروس کے متعدد دیگر افسران کو بھی خیبر پختونخوا سے تبدیل کر کے اسٹیبلشمنٹ ڈویژن رپورٹ کرنے کی ہدایت کی گئی ہے۔ ان میں گریڈ 21 کے اکرام اللہ اور عنبر علی خان، گریڈ 20 کے شاہد اللہ اور سہیل خان، گریڈ 19 کے شاہ فہد، کیپٹن ریٹائرڈ میاں عادل اقبال، محمد عثمان، کیپٹن ریٹائرڈ سرمد سلیم اکرم اور شفیع اللہ خان شامل ہیں۔اسی طرح گریڈ 18 کے کیپٹن ریٹائرڈ زبیر خان، وقار علی، کیپٹن ریٹائرڈ ثناء اللہ خان، محمد احتشام الحق اور محمد فہیم کے تبادلے کے احکامات بھی جاری کیے گئے ہیں۔