کے پی کابینہ نے معمولی کیسز کے قیدیوں کو بڑی خوشخبری سنا دی
پشاور(جانو ڈاٹ پی کے) خیبر پختونخوا کی صوبائی کابینہ نے جیل خانہ جات، تحفظ گواہان، گاڑیوں کی رجسٹریشن سمیت مختلف اہم امور سے متعلق متعدد فیصلوں کی منظوری دے دی۔
وزیر اطلاعات خیبر پختونخوا شفیع جان نے صوبائی کابینہ اجلاس کے فیصلوں سے متعلق بریفنگ دیتے ہوئے بتایا کہ وزیراعلیٰ سہیل آفریدی کی زیرصدارت صوبائی کابینہ کا اجلاس ہوا، جس میں مختلف محکموں سے متعلق امور کا جائزہ لیا گیا اور اہم فیصلوں کی منظوری دی گئی۔
شفیع جان کے مطابق کابینہ اجلاس میں صوبائی محتسب کے دفتر کی سال 2025 کی کارکردگی رپورٹ بھی پیش کی گئی، جسے خیبر پختونخوا اسمبلی میں پیش کرنے کی منظوری دے دی گئی۔
صوبائی کابینہ نے دو ماتحت یونٹس کے قیام، جی ٹو جی معاہدے، نظرثانی شدہ نرخوں اور معمولی نوعیت کے مقدمات میں قید افراد کے لیے دو ماہ کی خصوصی معافی کی منظوری بھی دی۔ خصوصی معافی کے فیصلے کے بعد متعلقہ قواعد و ضوابط کے مطابق نوٹیفکیشن جاری کرنے کی بھی منظوری دی گئی۔
اجلاس میں گاڑیوں کی رجسٹریشن اور تحفظ گواہان سمیت دیگر انتظامی امور پر بھی غور کیا گیا اور متعلقہ اقدامات کی منظوری دی گئی۔
وزیر اطلاعات کے مطابق کابینہ اجلاس میں گلیات سے مری کو پانی کی تقسیم و فراہمی کے طریقہ کار، نرخوں اور واجبات کا معاملہ بھی زیر بحث آیا۔ کابینہ نے اس معاملے کو مشترکہ مفادات کونسل (CCI) میں پیش کرنے کی منظوری دے دی۔
صوبائی حکومت کے مطابق کابینہ کے فیصلوں کا مقصد انتظامی امور میں بہتری، قانونی معاملات کو مؤثر بنانا اور مختلف محکموں سے متعلق معاملات کو قواعد و ضوابط کے مطابق آگے بڑھانا ہے۔
