کپڑوں پرسیاست اور کشمیر کی کشیدہ صورتحال،ملک میں2محاذ کھل گئے

لاہور(خصوصی رپورٹ:جانو ڈاٹ پی کے)​عوامی مقامات پر ڈریس کوڈ کے مطالبے پر گلوکار فلک شبیر اور حکومتی مشیر حنا پرویز بٹ کے درمیان ہونے والی تلخ کلامی نے سوشل میڈیا پر ہنگامہ برپا کر دیا ہے، جبکہ دوسری جانب آزاد کشمیر کی صورتحال بھی انتہائی سنگین رخ اختیار کر گئی ہے۔ گلوکار فلک شبیر نے وزیراعلیٰ پنجاب مریم نواز سے مطالبہ کیا ہے کہ عوامی مقامات پر نامناسب لباس کے خلاف قانون سازی کی جائے تاکہ معاشرتی اقدار کا تحفظ ممکن ہو سکے، جس پر حنا پرویز بٹ نے سخت ردعمل دیتے ہوئے گلوکار کی سوچ کو پاکستان کی ترقی میں رکاوٹ قرار دے دیا ہے۔

​ایک ایسے وقت میں جب یہ بحث جاری ہے، آزاد جموں و کشمیر میں عوامی جوائنٹ ایکشن کمیٹی کے احتجاج اور ریاستی رٹ کے درمیان کشیدگی عروج پر پہنچ چکی ہے۔ چیئرمین بلاول بھٹو زرداری نے آزاد کشمیر کی صورتحال پر شدید تحفظات کا اظہار کرتے ہوئے پارٹی کا ہنگامی اجلاس طلب کر لیا ہے تاکہ اس سیاسی بحران کا کوئی پائیدار حل نکالا جا سکے۔ دریں اثنا، آزاد کشمیر کی سپریم کورٹ نے مہاجرین کی 12 نشستوں کے حوالے سے دائر صدارتی ریفرنس پر فیصلہ سناتے ہوئے حکومت کو بڑی قانونی حمایت فراہم کی ہے اور قرار دیا ہے کہ ان نشستوں میں ردوبدل صرف آئینی ترمیم کے ذریعے ہی ممکن ہے۔ ایک طرف معاشرتی اقدار پر بحث تو دوسری طرف کشمیر کی سیاسی ہلچل نے ملک بھر میں ایک نیا سیاسی ماحول پیدا کر دیا ہے۔