سہیل آفریدی کہاں ہیں؟ خیبر پختونخوا میں گورنر راج کب تک رہے گا؟ اختیار ولی کا اہم بیان
پشاور(جانوڈاٹ پی کے) خیبر پختونخوا میں ایمرجنسی اور گورنر راج کے نفاذ کے بعد معطل وزیراعلیٰ سہیل آفریدی کی موجودگی کے حوالے سے اہم بیان سامنے آیا ہے۔ وزیراعظم کے معاون خصوصی اختیار ولی نے دعویٰ کیا ہے کہ سہیل آفریدی حفاظتی تحویل میں ہیں، جبکہ گورنر راج ضرورت کے مطابق برقرار رکھا جائے گا۔
اختیار ولی کے مطابق خیبر پختونخوا میں گورنر راج اس وقت تک نافذ رہے گا جب تک اس کی ضرورت محسوس کی جائے گی۔ ان کا کہنا تھا کہ اگر انتخابات تک بھی گورنر راج برقرار رکھنے کی ضرورت پیش آئی تو اسے جاری رکھا جائے گا، تاہم انتخابات مقررہ وقت پر ہوں گے اور ان میں کوئی رکاوٹ نہیں ڈالی جائے گی۔
سہیل آفریدی کی موجودگی کے حوالے سے گفتگو کرتے ہوئے وزیراعظم کے معاون خصوصی نے کہا کہ وزیراعلیٰ اور ارکانِ صوبائی اسمبلی پہلے ہی معطل تھے اور اسمبلی بھی مؤثر انداز میں کام نہیں کر رہی تھی۔
اختیار ولی نے دعویٰ کیا کہ سہیل آفریدی حفاظتی تحویل میں ہیں اور انہوں نے خود کو اپنی مرضی سے حکام کے حوالے کیا ہے۔ ان کے مطابق اب بے لاگ احتساب ہوگا اور کسی کو نہیں چھوڑا جائے گا۔
خیبر پختونخوا کی مجموعی صورتحال پر بات کرتے ہوئے اختیار ولی نے صوبے میں انتظامی اور امن و امان کے مسائل پر تنقید کی۔ ان کا الزام تھا کہ بعض اضلاع میں دہشت گردوں کو کھلی چھوٹ حاصل رہی ہے۔
وزیراعظم کے معاون خصوصی نے مزید کہا کہ وفاق کا خیبر پختونخوا میں کوئی سیاسی مقصد نہیں، بلکہ بنیادی ہدف صوبے میں امن و امان کی بحالی اور ترقی کو یقینی بنانا ہے۔
واضح رہے کہ سہیل آفریدی کی موجودہ حیثیت، گورنر راج کی مدت اور آئندہ انتخابات کے حوالے سے مزید تفصیلات متعلقہ حکام کے باضابطہ مؤقف اور فیصلوں کے بعد سامنے آئیں گی۔
