گرل فرینڈ نے فون بلاک کرنے پر بوائے فرینڈ کو قتل کر دیا

چھتیس گڑھ (جانوڈاٹ پی کے)بھارت کی ریاست چھتیس گڑھ کے بلاس پور میں ایک نوجوان لڑکی نے مبینہ طور پر اپنے بوائے فرینڈ کو فون نمبر بلاک کرنے کے تنازعے پر قتل کر دیا، جس نے مقامی شہریوں کو حیران کر دیا ہے۔

بھارتی میڈیا کے مطابق 25 سالہ کمتا پرساد سوریاونشی کرائے کے مکان میں رہتے تھے اور ایک مقامی ہوٹل میں کام کرتے تھے۔ پولیس نے بتایا کہ مقتول کی ملاقات 22 سالہ روشننی سوریاونشی سے چھ ماہ قبل انسٹاگرام پر ہوئی تھی اور دونوں کے درمیان محبت کا رشتہ قائم ہو گیا تھا۔

ذرائع کے مطابق گزشتہ چند دنوں سے کشیدگی اس وقت بڑھ گئی جب کمتا نے روشنی کا نمبر اور میسجز بلاک کر دیے۔ مشتعل ہو کر اور یہ شک کرتے ہوئے کہ اس نے کسی دوسری لڑکی سے دوستی کر لی ہے، روشنی چاقو لے کر کمتا کے مکان پہنچی۔

پولیس کے مطابق جیسے ہی کمتا نے دروازہ کھولا، روشنی نے موبائل فون کا مطالبہ کیا۔ جب کمتا نے انکار کیا تو شدید جھگڑا شروع ہو گیا، اور مبینہ طور پر روشنی نے کمتا کے سینے میں چھرا گھونپ دیا۔

کمتا کے روم میٹ نے شور سن کر باہر آ کر اسے فرش پر خون میں لت پت پایا۔ کمتا کو فوری طور اسپتال منتقل کیا گیا، لیکن وہ راستے میں ہی دم توڑ گئے۔

پولیس نے خاتون کو گرفتار کر لیا ہے اور قتل کا مقدمہ درج کر لیا ہے۔ پولیس ذرائع کے مطابق کمتا بی جے پی رہنما اور ضلع پنچایت صدر راجیش سوریاونشی کے بھتیجے تھے۔ ملزمہ نے ابتدائی طور پر پولیس کو بتایا کہ وہ چاقو صرف ڈرانے کے لیے لے کر آئی تھی۔ لاش کو پوسٹ مارٹم کے لیے اسپتال منتقل کر دیا گیا ہے۔