کراچی: سی ویو پر میراتھن ریس کا انعقاد،25 ممالک کے 7 ہزار سے زائد رنرز کی شرکت

کراچی (جانوڈاٹ پی کے)شہر قائد کے ساحلِ سمندر سی ویو پر عالمی معیار کی میراتھن ریس کا شاندار انعقاد کیا گیا، جس میں دنیا کے 25 مختلف ممالک سے تعلق رکھنے والے 7 ہزار سے زائد رنرز نے شرکت کی۔

اس رنگا رنگ اسپورٹس ایونٹ میں مردوں، خواتین اور بچوں نے بڑی تعداد میں حصہ لیا، جبکہ مختلف عمر کے افراد کی بھرپور شرکت نے میراتھن کو ایک منفرد اور یادگار ایونٹ بنا دیا۔

منتظمین کے مطابق ریس کو چار مختلف کیٹیگریز میں تقسیم کیا گیا تھا، جن میں 42، 21، 10 اور 5 کلومیٹر کے فاصلے شامل تھے۔ پہلے مرحلے میں فل میراتھن (42 کلومیٹر) اور ہاف میراتھن (21 کلومیٹر) کی دوڑ منعقد کی گئی، جبکہ دوسرے مرحلے میں 10 اور 5 کلومیٹر کی ریس کروائی گئی۔

میراتھن کا آغاز اور اختتام ساحلِ سی ویو پر واقع نشانِ پاکستان سے ہوا۔ ریس کے دوران سکیورٹی کے سخت انتظامات کیے گئے تھے، جبکہ شرکاء کی سہولت کے لیے طبی امداد، پانی اور ریفریشمنٹ پوائنٹس بھی قائم کیے گئے۔

منتظمین کا کہنا تھا کہ کراچی میراتھن ریس کا بنیادی مقصد عوام میں صحت مندانہ طرزِ زندگی کو فروغ دینا، جسمانی سرگرمی کی اہمیت اجاگر کرنا اور مثبت سماجی سرگرمیوں کو پروان چڑھانا ہے۔

شرکاء اور شہریوں نے ایونٹ کو خوش آئند قرار دیتے ہوئے اس کے تسلسل کی خواہش کا اظہار کیا اور کہا کہ ایسے مقابلے نہ صرف صحت بلکہ شہر کے مثبت تشخص کو بھی اجاگر کرتے ہیں۔