لبنان: اسرائیلی فائرنگ سے اقوام متحدہ امن دستے کا اہلکار زخمی

بیروت (مانیٹرنگ ڈیسک) صیہونی فورسز نے لبنان میں تعینات اقوام متحدہ کے امن دستے میں شامل فوجی اہلکار کو فائرنگ کر کے زخمی کر دیا۔

عرب میڈیا کے مطابق اقوام کی جانب سے بیان میں کہا گیا ہے کہ لبنان میں تعینات اس کی عارضی امن فوج کی پوزیشنز پر اسرائیلی حملے میں ایک اہلکار زخمی ہوگیا ہے، اسرائیل کی جانب سے یہ حملہ ایک جارحانہ اقدام ہے۔

واضح رہے کہ اقوام متحدہ کے امن دستے جنوبی لبنان کے علاقے میں اسرائیل اور لبنان کے درمیان فاصلہ برقرار رکھنے کیلئے کردار ادا کر رہے ہیں۔

اقوام متحدہ امن دستے کی جانب سے واقعے کی تفصیل میں مزید بتایا گیا ہے کہ بسترا گاؤں کے قریب فائرنگ کے ساتھ دستی بم دھماکا بھی ہوا ہے۔

یہاں یہ بات قابلِ ذکر ہے کہ اکتوبر کے مہینے میں بھی اسرائیل فوج کی جانب سے امن فوج پر دستی بم حملوں کے 3 مختلف واقعات رپورٹ ہوئے تھے جس میں ایک اہلکار کے زخمی ہونے کی اطلاع ملی تھی۔