سندھ کے اے آئی سسٹم نے150گاڑیاں،200چورپکڑادیئے

کراچی(جانو ڈاٹ پی کے)سندھ حکومت کے نئے منصوبے نے ’’کمال‘‘کردیا۔چھینی یا چوری کی گئی150سے زائد گاڑیاں برآمد کر لی گئیں۔

گاڑیوں کی چوری اور چھینا جھپٹی کے الزامات میں ایک خاتون سمیت200ملزمان کو گرفتار کیا جا چکا ہے۔چہروں اور نمبر پلیٹس کی شناخت کرنے والے جدید ترین آرٹیفیشل انٹیلی جنس کیمرے مختلف شہروں کے داخلی اور خارجی راستوں پر لگائے گئے ہیں۔

کراچی سے چھینی و چوری کی گئی تمام گاڑیوں اور مطلوب ملزمان کا ڈیٹا بھی ایس فور کیمروں کے ڈیٹا بینک میں شامل کیا گیا ہے۔جوں ہی چوری شدہ گاڑی یا ملزمان شہروں کے انٹری ایگزٹ راستوں سے گزرتے ہیں تو اے آئی کیمروں سے مذکورہ گاڑیوں اور ملزمان کی ازخود فوری نشاندہی ہو جاتی ہے۔کراچی میں حال ہی میں تشکیل دی گئی سندھ پولیس ہائی وے پیٹرول کا عملہ مذکورہ گاڑیوں کو روک کر ملزمان کو گرفتار کرتا ہے اور اس طرح سے چوری کی گئی یا چھینی گئی گاڑیاں برآمد کی جاتی ہیں۔