فاف ڈوپلیسی کا بھارتی لیگ کو بڑا جھٹکا،آئی پی ایل چھوڑ کر پی ایس ایل کھیلنے کا فیصلہ

جوہانسبرگ(مانیٹرنگ ڈیسک) جنوبی افریقہ کے سابق کپتان فاف ڈوپلیسی نے بھارتی لیگ آئی پی ایل کو ایک بڑا جھٹکا دے دیا۔ انہوں نے آئی پی ایل کے اگلے سیزن میں حصہ لینے سے معذرت کر لی اور اب وہ پاکستان سپر لیگ کے گیارہویں ایڈیشن کا حصہ ہوں گے۔

واضح رہے کہ آئی پی ایل کا آئندہ ایڈیشن 2026 میں شیڈول ٹی ٹوئنٹی ورلڈ کپ کے بعد منعقد ہوگا۔

میڈیا رپورٹس کے مطابق ویٹرن بلے باز نے پاکستان سپر لیگ (پی ایس ایل) سیزن 11 میں دستیابی کی تصدیق کر دی ہے۔

فاف ڈو پلیسی نے اس متعلق فیصلے کا اعلان انسٹاگرام پر ایک جذباتی پوسٹ میں کیا۔ پوسٹ میں انہوں نے آئی پی ایل کے ساتھ طویل مدتی وابستگی اور اس کے اپنے کیریئر پر پڑنے والے اثرات سے متعلق بتایا۔

سابق جنوبی افریقی کپتان کا کہنا تھا کہ آئی پی ایل میں 14 سیزن بعد انہوں نے اس برس آکشن میں نہ جانے کا فیصلہ کیا ہے۔ اس برس انہوں نے نیا چیلنج لینے کا فیصلہ کیا ہے اور وہ پی ایس ایل کے نئے سیزن میں شرکت کریں گے۔