پاکستان میں 10 ماہ میں کتنے موبائل فونز تیار کئے گئے؟ پہلے نمبر پر کونسی کمپنی؟
2025 کے پہلے دس ماہ میں پاکستان نے موبائل فون کی مجموعی ملکی ضرورت کا 94 فیصد حصہ مقامی پیداوار سے پورا کیا،پی ٹی اے
اسلام آباد(جانوڈاٹ پی کے) پاکستان میں موبائل فون کی مقامی تیاری میں تیزی سے اضافہ جاری ہے اور اکتوبر میں اسمارٹ فونز کی پیداوار مجموعی موبائل آؤٹ پٹ کا 53 فیصد تک پہنچ گئی جس سے ظاہر ہوتا ہے کہ مقامی اور غیر ملکی کمپنیوں نے اپنی مینوفیکچرنگ صلاحیت میں نمایاں اضافہ کیا ہے۔
پاکستان ٹیلی کمیونیکیشن (پی ٹی اے) کے مطابق رواں سال کے پہلے دس ماہ میں ملکی سطح پر 2 کروڑ 51 لاکھ سے زیادہ موبائل فون تیار کیے گئے۔ ان میں سے 1 کروڑ 32 لاکھ اسمارٹ فون جبکہ 1 کروڑ 19 لاکھ 2 جی فیچر فون تھے۔
اعداد و شمار کے مطابق 2025 کے پہلے دس ماہ میں پاکستان نے موبائل فون کی مجموعی ملکی ضرورت کا 94 فیصد حصہ مقامی پیداوار سے پورا کیا جو پچھلے کئی برسوں کے مقابلے میں ایک بہت بڑی بہتری ہے۔
پی ٹی اے کی فہرست کے مطابق 2025 میں مقامی طور پر سب سے زیادہ موبائل تیار کرنے والی کمپنیوں میں انفنکس پہلے نمبر پر رہی، اس کے بعد وی جی او ٹیل، ویوو، آئی ٹیل، ٹیکنو، سام سنگ، شاؤمی، کیو موبائل، ریئل می اور جی فائیو شامل ہیں۔
تجزیہ کاروں کا خیال ہے کہ اگلے ایک سال میں موبائل فون کی فروخت میں 7 سے 8 فیصد تک اضافہ ہو سکتا ہے کیونکہ مہنگائی میں کمی، شرح مبادلہ میں استحکام اور صارفین کی قوت خرید میں بہتری متوقع ہے۔
