22 سال کی عمر میں دنیا کے کم عمر ترین سیلف میڈ ارب پتی بننے والے 3 نوجوان

نیویارک(جانوڈاٹ پی کے)22 سال کی عمر میں بیشتر افراد نے بس اپنی عملی زندگی کا آغاز کیا ہوتا ہے اور کمانا شروع کرتے ہیں۔

مگر آرٹی فیشل انٹیلی جنس (اے آئی) ٹیکنالوجی سے متعلق ایک کمپنی کے 3 شریک بانی محض 22 سال کی عمر میں دنیا کے کم عمر ترین سیلف میڈ ارب پتی بن گئے ہیں۔

انہوں نے میٹا کے چیف ایگزیکٹو مارک زکربرگ کو پیچھے چھوڑ دیا ہے جو پہلی بار 23 سال کی عمر میں 2008 میں فوربز بلین ائیر لسٹ کا حصہ بنے تھے۔

فوربز کی رپورٹ کے مطابق برینڈن فوڈی، آدرش ہرمیت اور سوریا مدھیہ تعلیم کے حصول کے دوران دوست بنے اور انہوں نے امریکی شہر سان فرانسسکو میں Mercor نامی اے آئی ریکروٹنگ کمپنی کی بنیاد رکھی۔

اس کمپنی میں حال ہی میں 35 کروڑ ڈالرز کی سرمایہ کاری ہوئی جس کے بعد اس کی مجموعی مالیت 10 ارب تک پہنچ گئی۔

کمپنی کی قدر میں اضافے نے تینوں دوستوں یعنی برینڈن فوڈی (چیف ایگزیکٹو)، آدرش ہیرمیت (چیف ٹیکنالوجی آفیسر) اور سوریا مدھیہ (بورڈ چیئرمین) کو ارب پتی بنا دیا۔

آدرش ہیرمیت اور سوریا مدھیہ سان فرانسسکو کے Bellarmine College Preparatory میں ایک دوسرے سے ملے تھے اور انہوں نے وہاں تقریری مقابلے بھی جیتے۔

سوریا مدھیہ کے والدین بھارت سے امریکا گئے تھے اور ان کی پیدائش امریکا میں ہی ہوئی۔

آدرش ہیرمیت تعلیم کے حصول کے لیے بھارت سے امریکا گئے اور پھر وہاں مستقل طور پر بس گئے۔

انہوں نے فوربز کو بتایا کہ ‘جس چیز نے مجھے دنگ کیا ہے وہ یہ ہے کہ اگر میں اپنی کمپنی کے لیے کام نہیں کرتا، تو ابھی چند ماہ قبل ہی ڈگری حاصل کی ہوتی، میری زندگی بہت کم مدت میں ہمیشہ کے لیے بدل گئی’۔

آدرش ہیرمیت جب ہارورڈ گئے اور سوریا جارج ٹاؤن یونیورسٹی میں داخلے کی کوشش کر رہے تھے، تب ان کی ملاقات برینڈن فوڈی سے ہوئی۔

ان تینوں نے کمپنی کی بنیاد رکھنے کے لیے تعلیم چھوڑنے کا فیصلہ کیا۔

ان تینوں کو ایک ارب پتی سرمایہ کار Peter Thiel نے فیلو شپ فراہم کی تاکہ وہ اپنی کمپنی قائم کرسکیں۔

ابھی چند ہفتے پہلے پولی مارکیٹ نامی کرپٹو کرنسی مارکیٹ پلیٹ فارم کے 27 سالہ بانی Shayne Coplan کو دنیا کا کم عمر ترین سیلف میڈ ارب پتی قرار دیا گیا تھا۔

اس سے قبل یہ اعزاز 18 ماہ تک اسکین اے آئی کے بانی الیگزینڈر وانگ کے نام رہا تھا، جبکہ اسی کمپنی کی شریک بانی لوسی گیو 30 سال کی عمر میں دنیا کی کم عمر ترین سیلف میڈ خاتون ارب پتی قرار دی گئی تھیں۔