کاراباؤ کپ میں بڑا اپ سیٹ، فلیٹ ووڈ ٹاؤن نے آرسنل کو پنالٹی شوٹ آؤٹ میں ہرا دیا

لندن (ویب ڈیسک) انگلش فٹبال کے کاراباؤ کپ میں بڑا اپ سیٹ سامنے آیا ہے، جہاں چوتھے درجے کی ٹیم فلیٹ ووڈ ٹاؤن نے مضبوط حریف آرسنل کو پنالٹی شوٹ آؤٹ میں 3-5 سے شکست دے کر کوارٹر فائنل میں جگہ بنا لی۔

فلیٹ ووڈ ٹاؤن نے اپنے ہوم گراؤنڈ ہائیبری اسٹیڈیم میں آرسنل کے خلاف شاندار کھیل پیش کرتے ہوئے کلب کی تاریخ کی اہم ترین کامیابیوں میں سے ایک حاصل کی۔ دونوں ٹیموں کی رینکنگ میں 84 درجوں کا فرق تھا، تاہم میزبان ٹیم نے مقابلے میں بھرپور مزاحمت کی۔

میچ کے ابتدائی مرحلے میں اس وقت کھیل آٹھ منٹ سے زائد وقت کے لیے روکنا پڑا جب اسٹیڈیم کے اوپر ایک ڈرون نظر آیا۔

مقابلے کے 21ویں منٹ میں آرون لوپالو بی نے گول کرکے فلیٹ ووڈ ٹاؤن کو برتری دلائی۔ آرسنل نے دوسرے ہاف میں وکٹر گیوکیریس کے گول کی بدولت مقابلہ برابر کردیا، تاہم مقررہ وقت میں مزید کوئی گول نہ ہوسکا۔

میچ کے 86ویں منٹ میں آرسنل کو ایک اور دھچکا لگا، جب نوجوان کھلاڑی میکس ڈاؤمن کو مخالف کھلاڑی ہیریسن نیل کے ساتھ ٹکراؤ کے بعد لات چلانے پر ریڈ کارڈ دکھا کر میدان سے باہر بھیج دیا گیا۔

فیصلے کے لیے پنالٹی شوٹ آؤٹ کا سہارا لیا گیا، جہاں فلیٹ ووڈ ٹاؤن کے گول کیپر جے لنچ نے برونو گیمارائش کی پنالٹی روک کر اپنی ٹیم کی کامیابی میں اہم کردار ادا کیا۔

بعدازاں کونر ہاؤگھی نے فیصلہ کن پنالٹی اسکور کرکے فلیٹ ووڈ ٹاؤن کی فتح یقینی بنادی۔ اس کامیابی کے ساتھ ہی چوتھے درجے کی ٹیم نے مضبوط حریف آرسنل کو ٹورنامنٹ سے باہر کرتے ہوئے کوارٹر فائنل میں جگہ بنا لی۔