ساحل پر ریل بنانے کی مصروفیت، کمسن بچی سمندری لہروں کی زد میں آگئی

سوشل میڈیا (جانو ڈاٹ پی کے)سوشل میڈیا پر وائرل ہونے والی ایک ویڈیو نے بچوں کی حفاظت اور والدین کی ذمہ داریوں سے متعلق نئی بحث چھیڑ دی ہے۔ ویڈیو میں ساحلِ سمندر پر ایک مرد اور خاتون کو ویڈیو بناتے دیکھا جا سکتا ہے، جبکہ ان کے ساتھ موجود کمسن بچی اچانک پھسل کر ریت پر گر جاتی ہے اور سمندری لہریں اسے اپنی لپیٹ میں لے لیتی ہیں۔

ویڈیو شیئر کرنے والی خاتون مریم کے دعوے کے مطابق، ایک راہگیر نے فوری طور پر مداخلت کرتے ہوئے بچی کو لہروں سے نکال لیا۔ تاہم، واقعے کے مقام اور ویڈیو کی آزادانہ طور پر تصدیق نہیں ہو سکی۔

ویڈیو سامنے آنے کے بعد سوشل میڈیا صارفین نے بچوں کی نگرانی اور ساحلِ سمندر پر احتیاطی تدابیر کے حوالے سے سوالات اٹھائے ہیں۔ صارفین کے درمیان یہ بحث بھی شروع ہوگئی ہے کہ سوشل میڈیا کے لیے ریلز بنانے کی مصروفیت کہیں بچوں کی سلامتی پر غالب تو نہیں آ رہی۔

یہ واقعہ ایک بار پھر اس بات کی اہمیت اجاگر کرتا ہے کہ ساحلِ سمندر جیسے مقامات پر بچوں کو مسلسل نگرانی میں رکھنا ضروری ہے، کیونکہ اچانک آنے والی لہریں اور پھسلن کسی بھی وقت خطرے کا باعث بن سکتی ہیں۔