فائر سیفٹی انتظامات نامکمل قرار، اسلام آباد کے تمام ہفتہ وار بازار بند، تاجروں اور شہریوں کو بڑا دھچکا
بازاروں کی اچانک بندش پر تاجروں نے شدید تحفظات کا اظہار کرتے ہوئے کہا ہے کہ انہوں نے اپنی جیب سے کروڑوں روپے خرچ کرکے حفاظتی انتظامات مکمل کیے، اس کے باوجود کاروبار بند کرا دیا گیا۔ تاجر رہنما آصف ملک کے مطابق دکانداروں نے اپنی مدد آپ کے تحت سیکیورٹی گارڈز تعینات کیے اور دیگر ضروری اقدامات بھی کیے تھے۔
آصف ملک کا کہنا تھا کہ وہ رات کو بازار پہنچے تو وہاں بندش کا نوٹس لگا ہوا تھا۔ ان کے مطابق سی ڈی اے نے حفاظتی انتظامات پر کوئی رقم خرچ نہیں کی، جبکہ اچانک کاروبار بند ہونے سے تاجروں کو شدید مالی مشکلات کا سامنا کرنا پڑے گا۔
تاجروں کا کہنا ہے کہ ان کی دکانوں کی آمدن سے گھریلو اخراجات پورے ہوتے ہیں اور وہ ایک دن بھی کاروبار بند رکھنے کے متحمل نہیں ہوسکتے۔ دوسری جانب ہفتہ وار بازاروں سے کم قیمت پر اشیائے ضروریہ خریدنے والے شہری بھی پریشان ہیں، کیونکہ بازار بند رہنے کی صورت میں انہیں متبادل مقامات سے مہنگے داموں خریداری کرنا پڑ سکتی ہے۔
