اگلے 2ماہ ایران کیلئے انتہائی اہم،جے ڈی وینس نے بڑا پیغام دیدیا

واشنگٹن (جانو ڈاٹ پی کے) امریکی نائب صدر جے ڈی وینس نے کہا ہے کہ کسی بھی معاہدے تک پہنچنے کے لیے ایران کو اپنا رویہ تبدیل کرنا ہوگا، جبکہ واشنگٹن آئندہ تہران کے بیانات کے بجائے اس کے عملی اقدامات کا جائزہ لے گا۔

جے ڈی وینس کے مطابق ایران کے ساتھ مذاکرات محض زبانی یقین دہانیوں کے بجائے عملی اقدامات کی بنیاد پر ہوں گے۔ ان کا کہنا تھا کہ آنے والے دو ماہ کے دوران ایران جو اقدامات کرے گا، انہی سے یہ طے ہوگا کہ امریکا تہران کے ساتھ کس انداز میں پیش آئے گا۔

ایرانی رہبرِ اعلیٰ آیت اللہ مجتبیٰ خامنہ ای کی صورتحال سے متعلق سوال پر امریکی نائب صدر نے کہا کہ واشنگٹن کا خیال ہے کہ وہ اب بھی حیات ہیں، تاہم روزمرہ امور میں براہِ راست شامل نہیں ہیں۔ جے ڈی وینس نے اس اندازے کی بنیاد یا اس سے متعلق انٹیلی جنس معلومات کی مزید تفصیلات فراہم نہیں کیں۔

یہ بیان ایسے وقت میں سامنے آیا ہے جب امریکا اور ایران کے درمیان ثالثوں کے ذریعے بالواسطہ رابطے جاری ہیں۔ مذاکرات میں ایران کے جوہری پروگرام، امریکی پابندیوں اور آبنائے ہرمز کی صورتحال سمیت متعدد معاملات زیر بحث ہیں۔

دوسری جانب امریکی صدر ڈونالڈ ٹرمپ نے ان رپورٹس کی تردید کی ہے جن میں کہا گیا تھا کہ واشنگٹن نے ایران کو جوہری پروگرام میں پیش رفت کے بدلے پابندیوں میں نرمی یا منجمد ایرانی اثاثوں کی واپسی کی پیشکش کی ہے۔ ٹرمپ نے کہا کہ انہوں نے ایران کو ایسی کوئی پیشکش نہیں کی۔

ایران کی جانب سے بھی مذاکرات پر آمادگی کے اشارے دیے گئے ہیں، تاہم تہران کا مؤقف ہے کہ کسی معاہدے کے لیے اس پر دباؤ نہیں ڈالا جا سکتا، جبکہ آبنائے ہرمز سے متعلق ایرانی شرائط بھی مذاکرات کا اہم حصہ بنی ہوئی ہیں۔