پاسدارانِ انقلاب کا امریکی عوام کے نام کھلا خط، ٹرمپ پالیسیوں کی مخالفت کا مطالبہ

 تہران (جانو ڈاٹ پی کے) ایران کی پاسدارانِ انقلاب نے امریکی عوام کے نام 25 صفحات پر مشتمل کھلا خط جاری کرتے ہوئے امریکی صدر ڈونلڈ ٹرمپ کی پالیسیوں کی مخالفت اور اسرائیل کی حمایت ختم کرنے کا مطالبہ کردیا۔

ایرانی پاسدارانِ انقلاب کے ترجمان حسین محبی نے تہران میں پریس کانفرنس کے دوران کہا کہ ایران اور امریکا کے درمیان پُرامن بقائے باہمی ممکن ہے، تاہم اس کے لیے امریکا کو اپنی خارجہ پالیسی میں تبدیلی لانا ہوگی۔

انہوں نے امریکی عوام پر زور دیا کہ وہ بیرونِ ملک جنگوں اور اسرائیل کی حمایت سے متعلق حکومتی پالیسیوں کی مخالفت کریں۔ ان کے مطابق امریکی عوام کو خطے کی صورتِ حال سے متعلق مکمل معلومات فراہم نہیں کی جارہیں اور حقائق سامنے آنے کے بعد وہ اپنی رائے اور فیصلوں پر نظرثانی کرسکتے ہیں۔

حسین محبی نے صدر ٹرمپ کو ناقابلِ اعتماد قرار دیتے ہوئے امریکی حکومت پر ایران کو فوجی کارروائیوں اور معاشی پابندیوں کے ذریعے دباؤ میں لانے کا الزام بھی عائد کیا۔ پاسدارانِ انقلاب نے امریکا سے فوجی مداخلت اور اس کے بقول جنگی جرائم کا سلسلہ ختم کرنے کا مطالبہ کیا۔

ایرانی ترجمان نے آبنائے ہرمز سے متعلق امریکی دعوؤں کو بھی مسترد کرتے ہوئے کہا کہ محدود تعداد میں تیل بردار جہازوں کی آمدورفت اس بات کا ثبوت نہیں کہ آبی گزرگاہ مکمل طور پر کھل گئی ہے۔

کھلے خط میں پاسدارانِ انقلاب نے امریکی حکومت پر ایران کے جوہری پروگرام کو جواز بنا کر ملک کے قدرتی وسائل اور دولت پر قبضے کی کوشش کا الزام بھی عائد کیا ہے۔ یہ الزامات ایرانی مؤقف کا حصہ ہیں، جن کی آزادانہ تصدیق اس رپورٹ میں شامل نہیں۔