پنگریو پولیس کے خلاف بیوہ خاتون کا احتجاج، بیٹے پر منشیات کا جھوٹا مقدمہ درج کرنے کا الزام

بدین (جانو ڈاٹ پی کے) پنگریو کے وارڈ نمبر ایک کے ملاح محلے کی رہائشی بیوہ خاتون زرینہ ملاح نے اپنے بیٹے کے ہمراہ پریس کلب کے باہر پنگریو پولیس کے خلاف احتجاج کرتے ہوئے انصاف کا مطالبہ کیا ہے۔

میڈیا سے گفتگو کرتے ہوئے زرینہ ملاح نے الزام عائد کیا کہ مخالفین نے پنگریو پولیس سے مبینہ ملی بھگت کرکے ان کے بڑے بیٹے شریف ملاح کے خلاف منشیات کا جھوٹا مقدمہ درج کرایا ہے۔

خاتون کا کہنا تھا کہ مخالفین کی جانب سے ان کے گھر کے پلاٹ کو انتہائی کم قیمت پر فروخت کرنے کے لیے دباؤ ڈالا جا رہا ہے، تاہم مذکورہ پلاٹ ان کے مرحوم شوہر کی امانت ہے اور وہ اسے کسی صورت فروخت نہیں کریں گی۔

زرینہ ملاح کے مطابق پنگریو تھانے کے ایس ایچ او مولچند نے رات کے وقت ان کے گھر میں داخل ہوکر تلاشی لی، تاہم ان کے بقول گھر سے کوئی منشیات برآمد نہیں ہوئی، اس کے باوجود ان کے بیٹے شریف ملاح کے خلاف منشیات کا مقدمہ درج کردیا گیا۔

انہوں نے مزید الزام عائد کیا کہ پنگریو شہر میں آئس، شراب اور دیگر منشیات کی مبینہ فروخت جاری ہے، جس کے خلاف پولیس کو کارروائی کرنی چاہیے۔

بیوہ خاتون نے آئی جی سندھ، ایس ایس پی بدین اور دیگر متعلقہ حکام سے مطالبہ کیا کہ معاملے کی غیرجانبدارانہ انکوائری کرائی جائے، ان کے بیٹے کے خلاف درج مقدمے کی شفاف تحقیقات کی جائیں اور اگر مقدمہ بے بنیاد ثابت ہو تو اسے ختم کرکے انہیں انصاف فراہم کیا جائے۔