بغیر ایک گیند کھیلے ایشین گیمز سے باہر! چین کی ویمنز کرکٹ ٹیم کا عجیب و غریب اختتام
ٹوکیو(جانو ڈاٹ پی کے)ایشین گیمز میں چین کی ویمنز کرکٹ ٹیم کو انتہائی غیر معمولی صورتحال کا سامنا کرنا پڑا، ٹیم ایک بھی گیند کھیلے بغیر کوارٹر فائنل سے باہر ہوگئی۔
نِسّن کے کوروجی اسپورٹس پارک میں چین اور بنگلہ دیش کے درمیان کوارٹر فائنل میچ خراب فیلڈ کے باعث منسوخ کردیا گیا۔ میدان کی حالت اس قدر خراب تھی کہ میچ کا ٹاس بھی ممکن نہ ہوسکا۔
ناک آؤٹ مرحلہ ہونے کے باعث قوانین کے تحت کسی ایک ٹیم کو سیمی فائنل میں جگہ دینا ضروری تھا۔ میچ بے نتیجہ ختم ہونے کی صورت میں بہتر آئی سی سی ویمنز ٹی20 رینکنگ رکھنے والی ٹیم کو اگلے مرحلے میں پہنچانے کا اصول لاگو ہوا۔
بنگلہ دیش ویمنز ٹی20 رینکنگ میں چین سے بہتر پوزیشن پر تھی، جس کے باعث اسے بغیر بیٹنگ اور بولنگ کیے سیمی فائنل میں رسائی مل گئی، جبکہ چین کا ایشین گیمز کا سفر اختتام پذیر ہوگیا۔
چین کی ٹیم کے لیے یہ نتیجہ خاص طور پر مایوس کن رہا، جس نے مئی میں بارش سے متاثرہ کوالیفائر میں نیپال کو 5 وکٹوں سے شکست دے کر ایشین گیمز کے لیے کوالیفائی کیا تھا۔
یہ چین کی خواتین کرکٹ ٹیم کی ایشین گیمز میں تیسری شرکت تھی۔ ٹیم اس سے قبل 2010 اور 2014 کے ایڈیشنز میں بھی شریک ہوچکی ہے۔
بنگلہ دیش اب 20 ستمبر کو سیمی فائنل میں بھارت اور میزبان جاپان کے درمیان ہونے والے کوارٹر فائنل کی فاتح ٹیم کا سامنا کرے گا، جبکہ چین کی ٹیم بغیر ایک بھی گیند کا سامنا کیے ایشین گیمز سے باہر ہوگئی۔
