لیڈزٹیسٹ میں انگلینڈکاپلڑابھاری،409رنزپرڈھیر،پاکستان پر238رنزکی برتری

لیڈز (جانو ڈاٹ پی کے) لیڈز ٹیسٹ کے تیسرے دن انگلینڈ نے پاکستان کے خلاف پہلی اننگز میں 409 رنز بنا کر پوری ٹیم پویلین بھیج دی اور پہلی اننگز میں پاکستان پر 238 رنز کی بھاری برتری حاصل کرلی۔

انگلینڈ نے تیسرے دن کھیل کا آغاز 195 رنز کی برتری کے ساتھ کیا اور مجموعی طور پر 89.5 اوورز بیٹنگ کی۔ انگلش بیٹنگ میں ہیری بروک 91 رنز بناکر نمایاں رہے جبکہ جارڈن کوکس نے 73، جو روٹ نے 66 اور لارنس نے 51 رنز کی اہم اننگز کھیلی۔

پاکستان کی جانب سے بائیں ہاتھ کے اسپنر علی عثمان نے شاندار بولنگ کرتے ہوئے 5 وکٹیں حاصل کیں۔ وہ انگلینڈ میں پانچ وکٹیں لینے والے پہلے پاکستانی بائیں ہاتھ کے اسپنر بن گئے۔ خرم شہزاد نے 3 جبکہ محمد عباس اور محمد علی نے ایک، ایک کھلاڑی کو آؤٹ کیا۔

اس سے قبل پاکستان کی پوری ٹیم پہلی اننگز میں صرف 171 رنز پر آؤٹ ہوگئی تھی۔ عبداللہ شفیق 61 رنز کے ساتھ ٹاپ اسکورر رہے، امام الحق نے 42 اور کپتان سلمان علی آغا نے 21 رنز بنائے۔ خرم شہزاد نے 14 جبکہ محمد رضوان 12 رنز بناسکے۔

انگلینڈ کی جانب سے حاصل کی گئی 238 رنز کی برتری نے پاکستان کے لیے ٹیسٹ میچ میں واپسی کا راستہ مزید مشکل بنا دیا ہے، تاہم پاکستانی بیٹنگ کو اب دوسری اننگز میں بڑا اسکور کرکے خسارہ کم کرنا ہوگا۔