سندھ حکومت کا خواتین کے لیے 1000 مزید پنک ای وی اسکوٹیز خریدنے کا فیصلہ

کراچی (جانوڈاٹ پی کے) سندھ حکومت نے خواتین کے لیے ٹرانسپورٹ سہولتوں کو وسعت دینے کے لیے ایک بڑا نیا پیکج اعلان کیا ہے، جس کے تحت 1000 مزید “پنک ای وی اسکوٹیز” خریدنے کا فیصلہ کیا گیا ہے۔ یہ اقدام صوبائی وزیر ٹرانسپورٹ و ماس ٹرانزٹ شرجیل انعام میمن کی زیر صدارت اجلاس میں سامنے آیا، جس میں محکمہ ٹرانسپورٹ کے اعلیٰ حکام نے بھی شرکت کی۔

اجلاس میں بتایا گیا کہ کراچی سمیت پورے سندھ میں ماس ٹرانزٹ نظام کو جدید خطوط پر استوار کیا جا رہا ہے۔ اس سلسلے میں نہ صرف نئی ای وی اور ڈبل ڈیکر بسیں لانے کا فیصلہ کیا گیا ہے بلکہ انٹر سٹی پیپلز بس سروس بھی شروع کی جا رہی ہے، جس سے لاڑکانہ، دادو، سہون، حیدرآباد، سانگھڑ اور دیگر اضلاع آپس میں بہتر انداز میں جڑ سکیں گے۔

شرجیل انعام میمن کے مطابق خیرپور تا روہڑی اور خیرپور تا رانی پور نئے روٹس آئندہ ہفتے سے شروع کیے جائیں گے، جبکہ کراچی میں بھی پبلک ٹرانسپورٹ کے نیٹ ورک کو بڑھایا جا رہا ہے۔ حکومت کا کہنا ہے کہ یہ تمام اقدامات شہریوں کو محفوظ، سستا اور ماحول دوست سفر فراہم کرنے کے لیے کیے جا رہے ہیں۔

اجلاس میں اس بات پر بھی زور دیا گیا کہ پنک ای وی اسکوٹیز خواتین کو بااختیار بنانے اور ان کی نقل و حرکت کو محفوظ بنانے میں اہم کردار ادا کریں گی، جبکہ ای وی اور ہائبرڈ بسیں شہر میں فضائی آلودگی کم کرنے میں مددگار ہوں گی۔

حکام کے مطابق آنے والے مہینوں میں مزید نئی بسیں سندھ کے مختلف شہروں میں پہنچا دی جائیں گی تاکہ عوام کو بہتر سفری سہولتیں فراہم کی جا سکیں۔