پنجاب پولیس میں اعلیٰ سطح کی اکھاڑ پچھاڑ

لاہور (جانو ڈاٹ پی کے)پنجاب پولیس میں اعلیٰ سطح پر بڑے پیمانے پر تقرر و تبادلے کر دیے گئے، حکومت پنجاب کی منظوری کے بعد چیف سیکریٹری پنجاب نے افسران کی نئی تعیناتیوں کا باقاعدہ نوٹیفکیشن جاری کردیا۔نوٹیفکیشن کے مطابق انعام الرحمٰن ملک کو ریجنل پولیس آفیسر فیصل آباد تعینات کردیا گیا، جبکہ سہیل اختر کا تبادلہ کرکے انہیں ریجنل پولیس آفیسر سرگودھا مقرر کیا گیا ہے۔محمد شہزاد آصف خان کو ڈی آئی جی انفارمیشن ٹیکنالوجی، سی پی او پنجاب لاہور تعینات کیا گیا ہے، جبکہ منصور الحق رانا کو ڈی آئی جی ایلیٹ فورس پنجاب کی ذمہ داریاں سونپ دی گئی ہیں۔اسی طرح ذیشان اصغر کو کمانڈنٹ پولیس ٹریننگ کالج لاہور، جبکہ صادق علی ڈوگر کو کمانڈنٹ پولیس اسکول آف انٹیلیجنس پنجاب لاہور تعینات کردیا گیا۔نوٹیفکیشن کے مطابق اختر فاروق کو سٹی پولیس آفیسر ملتان مقرر کیا گیا ہے۔پنجاب پولیس میں افسران کی حالیہ سطح پر تقرریاں اور تبادلے انتظامی ڈھانچے میں اہم تبدیلیوں کے طور پر سامنے آئے ہیں۔ پنجاب پولیس کی سرکاری ویب سائٹ پر مختلف ریجنل پولیس دفاتر اور افسران سے متعلق معلومات بھی دستیاب ہیں۔