صرف مہندی نہیں؛ جادوئی پتوں سے گھر پر تیار کریں ہربل ہئیر کلر!
تحریر:ایمل سفیان
سفید بالوں کی پریشانی اب صرف عمر رسیدہ افراد تک محدود نہیں رہی، بلکہ کم عمر نوجوان بھی قبل از وقت بال سفید ہونے کی وجہ سے پریشان نظر آتے ہیں۔ بالوں کو رنگنے کے لیے صدیوں سے مہندی کا استعمال کیا جاتا رہا ہے، لیکن حالیہ دور میں قدرتی اور جڑی بوٹیوں پر مبنی تراکیب میں”مورنگا” (سہانجنا) کے پتے ایک حیرت انگیز تحفہ بن کر سامنے آئے ہیں۔
کیمیکل سے بھرپور ہیئر ڈائی کے برعکس، مورنگا کے پتے بالوں کو نہ صرف قدرتی سیاہی اور خوبصورتی عطا کرتے ہیں بلکہ انہیں جڑوں سے مضبوط اور صحت مند بھی بناتے ہیں۔
مورنگا کے پتے: بالوں کے لیے ایک قدرتی خزانہ
مورنگا کے پتوں کو وٹامنز، معدنیات، اور طاقتور اینٹی آکسیڈنٹس کا پاور ہاؤس مانا جاتا ہے۔ اس میں موجود اجزاء بالوں کے لیے انتہائی مفید ہیں:
وٹامنز اور بایوٹین: بالوں کے پٹکوں (Hair Follicles) کو گہرائی سے خوراک فراہم کرتے ہیں۔
امینو ایسڈز: بالوں کے بنیادی جزو کیراٹین (Keratin) کی پیداوار میں مددگار ثابت ہوتے ہیں۔
اینٹی آکسیڈنٹس: کھوپڑی کی صحت کو بہتر بناتے ہیں اور بالوں کو قبل از وقت سفید ہونے سے روکتے ہیں۔
گھر پر ہربل ہئیر کلر تیار کرنے کا طریقہ
مہندی کے ساتھ مورنگا ملا کر ایک طاقتور اور محفوظ ہربل ڈائی گھر پر با آسانی تیار کی جا سکتی ہے:
اجزاء: مورنگا کے تازہ یا خشک پتے (ایک مٹھی)، مہندی پاؤڈر، آملہ پاؤڈر، میتھی دانہ، چائے کا پاؤڈر، ہیبسکس (گڑہل) کے چند پتے اور پھول، اور پانی۔
بنانے کا طریقہ: ایک برتن میں پانی لے کر اس میں میتھی دانہ، چائے کا پاؤڈر اور مورنگا کے پتے ڈال کر اچھی طرح ابال لیں۔ اب اس ابلے ہوئے پانی میں مورنگا کے تازہ پتے، ہیبسکس کے پتے اور پھول شامل کرکے پیس لیں۔ لوہے کے برتن میں مہندی پاؤڈر اور آملہ پاؤڈر لے کر اس پیسٹ کو اچھی طرح ملا لیں اور بہتر نتائج کے لیے ایک دن کے لیے ڈھانپ کر رکھ دیں۔
استعمال کا طریقہ اور احتیاط
اپنے بالوں کو حصوں میں تقسیم کریں اور اس ہربل رنگ کو خاص طور پر سفید بالوں پر اچھی طرح لگائیں۔
اسے تقریباً 30 منٹ تک لگا رہنے دیں اور پھر صرف سادہ یا ٹھنڈے پانی سے دھو لیں۔
بالوں کو دھونے کے لیے شیمپو کے بجائے ٹی ٹری آئل یا پانی کا استعمال کریں۔
کیمیکل کے نقصانات سے بچنے اور اپنے بالوں کو قدرتی سیاہی، چمک اور مضبوطی بخشنے کے لیے مورنگا اور مہندی کا یہ امتزاج ایک بہترین گھریلو نسخہ ہے۔
