ڈیفنس میں گاڑی سے لاش ملنے کا واقعہ، عادل کو قتل نہیں کیا گیا اس نے خودکشی کی، پولیس
لاہور(جانوڈاٹ پی کے) ڈیفنس کے علاقے میں دو روز قبل گاڑی سے ملنے والی نوجوان عادل کی لاش کے معاملے میں پولیس نے ابتدائی تحقیقات مکمل کرتے ہوئے کہا ہے کہ واقعہ قتل نہیں بلکہ خودکشی کا نتیجہ معلوم ہوتا ہے۔
پولیس کے مطابق متوفی عادل خاندانی تنازعات اور شدید ذہنی دباؤ کا شکار تھا۔ تحقیقات میں اب تک ایسے شواہد سامنے نہیں آئے جو قتل کی نشاندہی کرتے ہوں۔
حکام کا کہنا ہے کہ گاڑی سے برآمد ہونے والی پولیس وردی سب انسپکٹر طاہر کی تھی، تاہم تحقیقات سے معلوم ہوا ہے کہ عادل اور سب انسپکٹر طاہر آپس میں دوست تھے، جس کے باعث وردی گاڑی میں موجود تھی۔
پولیس کے مطابق واقعے کے مختلف پہلوؤں کا جائزہ لیا گیا ہے اور دستیاب شواہد کی بنیاد پر خودکشی کا امکان زیادہ مضبوط نظر آتا ہے، تاہم حتمی رائے فرانزک اور دیگر تفتیشی رپورٹس مکمل ہونے کے بعد دی جائے گی۔
پولیس کا مؤقف ابتدائی تحقیقات پر مبنی ہے، جبکہ واقعے کی مکمل حقیقت فرانزک شواہد اور حتمی تفتیشی رپورٹ سامنے آنے کے بعد ہی واضح ہوگی۔
