خیبرپختونخوا میں علاقائی سطح پر بڑی پیشرفت،48ارکان کے نام فائنل
خیبرپختونخوا کے 12 اضلاع میں علاقائی نمائندہ و ترقیاتی کونسل کے 48 ارکان کی حتمی فہرست سامنے آگئی، جس کے بعد قبائلی اور علاقائی سطح پر اہم پیش رفت ہوئی ہے۔ وفاقی حکومت نے نئے کونسل ارکان کی نامزدگی کا باضابطہ نوٹیفکیشن جاری کر دیا ہے، جبکہ کونسل کی قیادت بھی مقرر کر دی گئی ہے۔
ضلع باجوڑ سے تعلق رکھنے والے شوکت اللہ خان کو کونسل کا چیئرپرسن مقرر کیا گیا ہے، جبکہ شمالی وزیرستان کے ملک خان مرجان وائس چیئرپرسن کی ذمہ داریاں سنبھالیں گے۔ کونسل میں مختلف اضلاع اور قبائل سے تعلق رکھنے والی شخصیات کو نمائندگی دی گئی ہے۔
48 نمائندگان کی نامزدگی کا عمل مقامی جرگوں کی مشاورت سے مکمل کیا گیا۔ ڈپٹی کمشنرز کے تعاون سے منعقدہ جرگوں میں مقامی نمائندوں کے نام تجویز کیے گئے، جنہیں علاقہ ترقیاتی سیکریٹریٹ، چیف سیکریٹری اور گورنر خیبرپختونخوا کے ذریعے وفاقی حکومت کو ارسال کیا گیا۔
نئی کونسل میں باجوڑ، مہمند، خیبر، کرم، اورکزئی، شمالی وزیرستان، جنوبی وزیرستان اپر و لوئر، بنوں، ڈیرہ اسماعیل خان، ٹانک اور لکی مروت کے نمائندگان شامل ہیں۔ ان اضلاع سے 3 سے 5 ارکان نامزد کیے گئے ہیں، جو کونسل میں اپنے اپنے علاقوں کی نمائندگی کریں گے۔
اس پیش رفت کے بعد توجہ اس بات پر مرکوز ہوگی کہ نئی کونسل علاقائی نمائندگی اور ترقیاتی امور میں کیا کردار ادا کرتی ہے اور مقامی سطح پر عوامی مسائل کے حل کے لیے کون سے اقدامات کیے جاتے ہیں۔
