اب یہ فیصلہ کن معرکہ ہوگا،خواجہ آصف کا پی ٹی آئی کے مارچ پر سخت بیان

نیویارک (جانو ڈاٹ پی کے)وزیر دفاع خواجہ آصف نے پاکستان تحریک انصاف کے ممکنہ اسلام آباد مارچ پر سخت ردعمل دیتے ہوئے کہا ہے کہ پی ٹی آئی وفاقی دارالحکومت کو سومنات کے مندر سے تشبیہ دے رہی ہے، اگر وہ اسلام آباد کی جانب آتی ہے تو یہ ان کی آخری کوشش ہوگی، اس کے بعد وہ اس طرح دوبارہ دارالحکومت کا رخ نہیں کرسکیں گے۔وزیر دفاع خواجہ آصف وزیراعظم شہباز شریف کے وفد کے ہمراہ اقوام متحدہ کی جنرل اسمبلی کے اجلاس کے لیے نیویارک میں موجود ہیں، جہاں ایک حالیہ انٹرویو میں انہوں نے پی ٹی آئی کے 27 ستمبر کے مجوزہ اسلام آباد مارچ کے حوالے سے گفتگو کی۔

خواجہ آصف نے کہا کہ پی ٹی آئی والے اسلام آباد کو سومنات سے تشبیہ دے رہے ہیں، تو سوال پیدا ہوتا ہے کہ ان کے عزائم بھی کیا اسی نوعیت کے ہیں۔ ان کے مطابق اسلام آباد ایک بڑی اسلامی اور ایٹمی ریاست کا دارالحکومت ہے اور یہ کوشش ان کے لیے آخری ہوگی۔وزیر دفاع نے کہا کہ اگر پی ٹی آئی اسلام آباد کی طرف آتی ہے تو یہ فیصلہ کن معرکہ ہوگا اور اس کے بعد وہ اس طرح دوبارہ وفاقی دارالحکومت کا رخ نہیں کرسکیں گے۔انہوں نے یہ امکان بھی ظاہر کیا کہ شاید پی ٹی آئی کے کارکن اسلام آباد آئیں ہی نہ، اور ان کے مطابق یہ بھی ایک فیصلہ کن بات ہوگی۔خواجہ آصف کا کہنا تھا کہ وفاق یا پاکستان اس نوعیت کی صورتحال کا مزید متحمل نہیں ہوسکتا۔ یہ بیان ایسے وقت میں سامنے آیا ہے جب پی ٹی آئی نے 27 ستمبر کو اسلام آباد کی جانب مارچ کا اعلان کر رکھا ہے۔