ایرانی جوہری پروگرام سے متعلق امور کا حل مکالمے کے ذریعے ہی ممکن ہے،پاکستان

نیویارک(مانیٹرنگ ڈیسک) پاکستان کے قائم مقام مستقل مندوب عثمان جدون نے کہا ہے کہ تصادم سے گریز کیا جائے، ایران کے جوہری پروگرام سے متعلق تمام امور کا حل مکالمے کے ذریعے ہی ممکن ہے۔

ایران کے جوہری معاملے پر سلامتی کونسل کے اجلاس سے خطاب میں پاکستان کے قائم مقام مستقل مندوب عثمان جدون نے کہا کہ کسی متبادل انتظام کے طے پانے تک جے سی پی او اے کے فریم ورک کو برقرار رکھا جانا چاہیے۔

ان کا کہنا تھا کہ حالیہ مہینوں میں کونسل کے اندر اور باہر اختلافات مزید گہرے ہوگئے ہیں، جس کے نتیجے میں اس مسئلے کے حل سے مزید دور ہوتے جا رہے ہیں، سفارت کاری کو کامیاب ہونے کیلئے مزید وقت دیا جانا چاہیے۔

انہوں نے مزید کہا کہ صورتحال پہلے ہی یو این منشور کی خلاف ورزیوں، طاقت کے یکطرفہ استعمال سے پیچیدہ ہو چکی ہے، معاملے پر ہمارا مؤقف بدستور برقرار ہے۔