لبنان میں اسرائیلی حملوں پر ایران کا اقوام متحدہ سے فوری اقدامات کا مطالبہ

تہران (جانوڈاٹ پی کے\ویب ڈیسک) ایران کی اعلیٰ انسانی حقوق کونسل نے اقوام متحدہ سے مطالبہ کیا ہے کہ لبنان میں شہریوں کے تحفظ، اسرائیلی خلاف ورزیوں کی دستاویز بندی اور جاری حملوں کے دوران مبینہ جرائم کے خلاف قانونی کارروائی کے لیے فوری اقدامات کیے جائیں۔

ایرانی انسانی حقوق کے ادارے نے اپنے بیان میں کہا کہ اسرائیلی فوج کے حالیہ مسلسل حملوں میں خواتین اور بچوں سمیت درجنوں شہری جاں بحق اور زخمی ہوئے ہیں۔ بیان میں عالمی برادری کی جانب سے شہریوں کو مزید جانی نقصان سے بچانے کے لیے مؤثر اقدامات نہ کیے جانے پر بھی تشویش کا اظہار کیا گیا۔

ایرانی کونسل کے مطابق شہریوں کو نشانہ بنانے والے حملے بنیادی انسانی حقوق، بالخصوص زندگی، تحفظ اور انسانی وقار کے حق کی خلاف ورزی ہیں۔

بیان میں مزید کہا گیا کہ اسرائیلی بمباری مسلح تنازعات کے دوران فوجی اور شہری اہداف میں فرق رکھنے اور طاقت کے متناسب استعمال سمیت بین الاقوامی انسانی قانون کے بنیادی اصولوں کی بھی خلاف ورزی ہے۔

ایران کی اعلیٰ انسانی حقوق کونسل نے اقوام متحدہ اور عالمی برادری پر زور دیا کہ لبنان میں شہریوں کے تحفظ کو یقینی بنانے اور مبینہ خلاف ورزیوں کے ذمہ دار عناصر کے خلاف قانونی کارروائی کے لیے مؤثر اقدامات کیے جائیں۔