وزیراعظم شہباز شریف سے ارکانِ پارلیمنٹ کی ملاقاتیں، عالمی امن کے لیے کردار پر خراجِ تحسین

اسلام آباد(جانوڈاٹ پی کے)وزیراعظم محمد شہباز شریف سے سینیٹر میر دوستین خان ڈومکی اور قومی اسمبلی کے اراکین چوہدری ندیم عباس ربیرہ، ڈاکٹر سعدف احسان اللہ، چوہدری عثمان اور محمد ادریس نے الگ الگ ملاقاتیں کیں۔

ملاقاتوں کے دوران اراکینِ قومی اسمبلی نے وزیراعظم کو عالمی امن کے قیام کے لیے ان کی کامیاب سفارتی کاوشوں پر خراجِ تحسین پیش کیا۔ انہوں نے کہا کہ وزیراعظم شہباز شریف کی قیادت میں پاکستان کو عالمی برادری میں تاریخی عزت و احترام حاصل ہوا ہے اور پاکستان کی کوششوں کے نتیجے میں خطے میں امن کے قیام کی راہ ہموار ہوئی۔

وزیراعظم شہباز شریف نے اراکینِ اسمبلی کے خیالات کا خیرمقدم کرتے ہوئے ان کے اعتماد پر شکریہ ادا کیا۔

اس موقع پر اراکینِ اسمبلی نے اس عزم کا اظہار کیا کہ وہ وزیراعظم کی قیادت میں قومی مفادات کے تحفظ، ملک کی ترقی اور خوشحالی کے ایجنڈے کی تکمیل کے لیے اپنا بھرپور کردار ادا کرتے رہیں گے۔

ملاقاتوں میں وفاقی وزیر برائے امورِ عامہ رانا مبشر اقبال اور وزیراعظم کے معاونِ خصوصی طلحہ برکی بھی شریک تھے۔