اسحاق ڈار اور انتونیو گوتریس کاعالمی تنازعات کے حل کیلئے مذاکرات پر زور

اسلام آباد (جانو ڈاٹ پی کے)نائب وزیراعظم و وزیر خارجہ اسحاق ڈار اور اقوام متحدہ کے سیکریٹری جنرل انتونیو گوتریس نے اسلام آباد میں مشترکہ پریس کانفرنس کرتے ہوئے عالمی اور علاقائی صورتحال، ایران امریکا کشیدگی، مسئلہ کشمیر اور تنازعات کے حل کیلئے مذاکرات اور کثیرالجہتی نظام کی اہمیت پر گفتگو کی۔

اسحاق ڈار نے اقوام متحدہ کے سیکریٹری جنرل کا پاکستان آمد پر گرمجوشی سے خیرمقدم کرتے ہوئے کہا کہ انتونیو گوتریس پاکستان کے نہایت قریبی دوست ہیں۔ انہوں نے کہا کہ گوتریس نے 2012 کے تباہ کن سیلاب کے دوران پاکستان کی بھرپور مدد کی تھی۔

نائب وزیراعظم نے کہا کہ دنیا بھر کی صورتحال انتہائی پیچیدہ ہے اور عالمی برادری کو ایران امریکا کشیدگی، حوثیوں اور باب المندب سمیت متعدد مسائل کا سامنا ہے۔ ان کا کہنا تھا کہ کئی عالمی تنازعات کے حوالے سے اقوام متحدہ کی قراردادیں موجود ہیں، تاہم اصل مسئلہ ان پر عملدرآمد کا ہے۔

اسحاق ڈار نے مسئلہ کشمیر کا حوالہ دیتے ہوئے کہا کہ یہ بھی ان معاملات میں شامل ہے جن کے بارے میں اقوام متحدہ کی قراردادیں موجود ہیں۔ ان کے مطابق قراردادوں پر عملدرآمد نہ ہونے کی صورت میں سزا اور جزا کا نظام طے کرنا ہوگا۔

اقوام متحدہ کے سیکریٹری جنرل انتونیو گوتریس نے کہا کہ تمام مسائل مذاکرات اور بات چیت کے ذریعے حل کیے جاسکتے ہیں اور اقوام متحدہ کا دفتر اس سلسلے میں ہر وقت تعاون کیلئے حاضر ہے۔ پاکستان کے دورے کے دوران گوتریس نے عالمی اور علاقائی امن و سلامتی کے معاملات پر پاکستانی قیادت سے تبادلہ خیال کیا۔

اسحاق ڈار نے کہا کہ ایران پر اسرائیلی حملے کے فوری بعد پاکستان ان ممالک میں شامل تھا جنہوں نے حملے کی مذمت کی۔ انہوں نے واضح کیا کہ پاکستان امن، سلامتی، مذاکرات اور کثیرالجہتی نظام پر یقین رکھتا ہے۔

نائب وزیراعظم کے مطابق اسلام آباد میں پاکستان کی مفاہمتی کوششوں کے نتیجے میں ایسے فریقین کو بھی ایک چھت تلے لانے کی کوشش کی گئی جو طویل عرصے سے ایک دوسرے کے ساتھ براہ راست بات چیت نہیں کر رہے تھے۔

دستیاب تازہ رپورٹس کے مطابق انتونیو گوتریس نے امریکا اور ایران پر زور دیا ہے کہ وہ جنگ کے خاتمے اور سفارت کاری کی طرف واپسی کیلئے اقدامات کریں، جبکہ انہوں نے امریکا ایران تنازع میں مذاکرات کی راہ ہموار کرنے میں پاکستان کے کردار کو بھی سراہا ہے۔

پاکستانی دفتر خارجہ کے مطابق اسحاق ڈار نے گوتریس کو امریکا اور ایران کے درمیان مذاکرات اور کشیدگی میں کمی کیلئے پاکستان کی سفارتی کوششوں سے بھی آگاہ کیا۔ دونوں رہنماؤں کے درمیان فلسطین، افغانستان، انسداد دہشت گردی، کشمیر اور کثیرالجہتی نظام کے مستقبل سمیت دیگر اہم معاملات پر بھی تبادلہ خیال ہوا۔