مسجد اقصیٰ میں آباد کاروں کی بڑی تعداد داخل، فلسطینی اوقاف نے 1,143 افراد کی موجودگی بتادی

مقبوضہ بیت المقدس(جانو ڈاٹ پی کے) مغربی کنارے میں اسرائیلی آباد کاروں کے فلسطینیوں اور ان کی املاک پر حملوں کے واقعات میں اضافے کے ساتھ مسجد اقصیٰ میں آباد کاروں کے داخلے کا سلسلہ بھی جاری ہے۔نابلس کے قریب جالود گاؤں میں 100 سے زائد اسرائیلی آباد کاروں نے فلسطینی گھروں اور گاڑیوں کو آگ لگائی، جبکہ ایک بے گھر فلسطینی خاندان کو اپنے گھر واپس جانے سے روکنے کا بھی الزام عائد کیا گیا ہے۔اقوام متحدہ کے مطابق ستمبر کے وسط تک ایک ہفتے کے دوران آباد کاروں کے 51 حملوں میں فلسطینیوں کو جانی نقصان پہنچا یا ان کی املاک متاثر ہوئیں، جبکہ تقریباً 800 درختوں کو تباہ، اکھاڑ یا نذرِ آتش کیا گیا۔دوسری جانب مسجد اقصیٰ میں بھی عیدِ سُکّوت کے دوران اسرائیلی پولیس کی حفاظت میں سینکڑوں آباد کاروں کے داخل ہونے اور مذہبی رسومات ادا کرنے کی اطلاعات سامنے آئی ہیں۔فلسطینی اوقاف کے مطابق 27 ستمبر کو 1,143 اسرائیلی آباد کار مسجد اقصیٰ کے احاطے میں داخل ہوئے، جبکہ 28 ستمبر کو بھی بڑی تعداد میں آباد کار مسجد اقصیٰ میں داخل ہوئے اور مذہبی رسومات ادا کیں۔ادھر مشرقی یروشلم کے قدیم شہر میں فلسطینی دکانداروں کو اپنی دکانیں بند رکھنے کی ہدایت دیے جانے کی بھی اطلاعات ہیں، جس کے باعث علاقے میں کشیدگی مزید بڑھنے کا خدشہ ظاہر کیا جا رہا ہے۔