عالمی مارکیٹ میں سونے کی قیمتوں میں کمی

کراچی(ویب ڈیسک) عالمی منڈی میں منگل کے روز سونے کی قیمتوں میں معمولی کمی ریکارڈ کی گئی، جبکہ سرمایہ کار امریکی فیڈرل ریزرو کے جون کے اجلاس کے منٹس کے اجرا کے منتظر ہیں، جن سے آئندہ شرحِ سود سے متعلق اہم اشارے ملنے کی توقع ہے۔

مارکیٹ اعداد و شمار کے مطابق اسپاٹ گولڈ کی قیمت 0.6 فیصد کمی کے بعد 4,138.32 ڈالر فی اونس تک آ گئی، جبکہ اگست کے لیے امریکی گولڈ فیوچرز بھی 0.4 فیصد تنزلی کے ساتھ 4,149.90 ڈالر فی اونس پر ٹریڈ کرتے رہے۔

مارکیٹ تجزیہ کاروں کا کہنا ہے کہ فیڈرل ریزرو کی آئندہ مالیاتی پالیسی سے متعلق غیر یقینی صورتحال کے باعث سونے کی قیمتیں دباؤ کا شکار ہیں۔ سرمایہ کار یہ جاننے کے خواہاں ہیں کہ امریکی مرکزی بینک آئندہ مہینوں میں شرحِ سود میں اضافہ کرے گا یا موجودہ پالیسی برقرار رکھے گا۔

ماہرین کے مطابق گزشتہ ہفتے امریکا میں توقع سے کمزور روزگار کے اعداد و شمار سامنے آنے کے بعد شرحِ سود میں اضافے کی توقعات میں کچھ کمی ضرور آئی ہے، تاہم مالیاتی منڈی اب بھی ستمبر میں شرحِ سود بڑھائے جانے کا تقریباً 56 فیصد امکان ظاہر کر رہی ہے۔

دوسری جانب ہانگ کانگ نے سونے کی کلیئرنگ کا نیا نظام متعارف کراتے ہوئے گولڈ فیوچر ٹریڈنگ بھی دوبارہ شروع کر دی ہے، جس کا مقصد ایشیا میں قیمتی دھاتوں کی تجارت کے ایک بڑے مرکز کے طور پر اپنی پوزیشن مزید مستحکم کرنا ہے۔

ماہرین کا کہنا ہے کہ فیڈرل ریزرو کے اجلاس کے منٹس جاری ہونے کے بعد سونے کی عالمی قیمتوں میں نمایاں اتار چڑھاؤ دیکھنے میں آ سکتا ہے، کیونکہ سرمایہ کار مستقبل کی مالیاتی پالیسی سے متعلق واضح اشاروں کے منتظر ہیں۔