ڈیپلو کے قریب شکاریوں کے ہاتھوں زخمی ہرن دم توڑ گیا، وائلڈ لائف محکمہ غائب

تھرپارکر (رپورٹ : میندھرو کاجھروی/ جانو ڈاٹ پی کے) ڈیپلو کے گاؤں پڑھیاری کے قریب چند دن قبل شکاریوں کی فائرنگ سے زخمی کیا گیا ہرن مردہ حالت میں ملا ہے۔

مقامی افراد کے مطابق، شکاری ہرن کو زخمی کرکے جنگل میں چھوڑ کر فرار ہو گئے تھے۔ بعد ازاں دیہاتیوں نے تلاش کے بعد ہرن کو ڈھونڈ لیا، تاہم وہ زخموں کی تکلیف برداشت نہ کر سکا اور جان سے ہاتھ دھو بیٹھا۔

واقعے کے بعد علاقے میں غم اور غصے کی لہر دوڑ گئی ہے۔ دیہاتیوں کا کہنا ہے کہ اگر بروقت کارروائی کی جاتی تو شاید ہرن کی جان بچ سکتی تھی۔

دیہاتیوں نے مطالبہ کیا ہے کہ واقعے میں ملوث شکاریوں کے خلاف فوری نوٹس لے کر سخت قانونی کارروائی کی جائے اور علاقے میں شکار کی روک تھام کے لیے گشت میں اضافہ کیا جائے۔

وائلڈ لائف محکمے کو بھی اطلاع دے دی گئی ہے تاکہ مزید تحقیقات کر کے ذمہ داروں کو قانون کے کٹہرے میں لایا جا سکے۔