کشیدگی میں اضافہ: امریکی طیارہ بردار بحری بیڑہ ابراہم لنکن مشرق وسطیٰ پہنچ گیا
واشنگٹن (مانیٹرنگ ڈیسک)مشرقِ وسطیٰ میں کشیدگی خطرناک حد تک بڑھ گئی ہے، جہاں امریکا کا جدید طیارہ بردار بحری بیڑہ ابراہم لنکن خطے کی سمندری حدود میں داخل ہوچکا ہے۔ امریکی میڈیا کے مطابق کیریئر اسٹرائیک گروپ میں جدید لڑاکا طیارے، میزائل کروزر اور ڈسٹرائرز شامل ہیں، جو کسی بھی ممکنہ کارروائی کے لیے مکمل طور پر تیار ہیں۔
امریکی ذرائع کا کہنا ہے کہ صدر ڈونلڈ ٹرمپ ایران کے خلاف ممکنہ فوجی کارروائی کے مختلف آپشنز کا جائزہ لے رہے ہیں، تاہم امریکا کے اتحادی ممالک نے فی الحال فوجی اقدام مؤخر کرنے پر زور دیا ہے۔ اس کے باوجود امریکی فوج نے خطے میں اپنی عسکری موجودگی میں اضافے کی باضابطہ تصدیق کر دی ہے۔
عرب میڈیا کے مطابق امریکی فضائیہ مشرقِ وسطیٰ میں بڑی فوجی مشقیں کرنے جا رہی ہے، جس سے پہلے ہی کشیدہ صورتحال میں مزید تناؤ پیدا ہونے کا خدشہ ظاہر کیا جا رہا ہے۔ یاد رہے کہ امریکی صدر نے گزشتہ ہفتے بحری بیڑے کو ایران کی سمت روانہ کرنے کا اعلان کیا تھا۔
دوسری جانب ایران نے امریکی دباؤ کو سختی سے مسترد کرتے ہوئے واضح مؤقف اختیار کیا ہے۔ ایرانی وزارتِ خارجہ کے ترجمان کا کہنا ہے کہ ایران اپنی دفاعی صلاحیتوں پر مکمل اعتماد رکھتا ہے اور امریکی جنگی جہازوں کی آمد ایرانی قوم کے دفاع کو متاثر نہیں کر سکتی۔
