پاکستانی ورکرز کیلئے یورپ کے دروازے کھل گئے، اٹلی سے ساڑھے 10ہزار نوکریوں کا کوٹہ لیا ہے، چوہدری سالک حسین

اسلام آباد(مانیٹرنگ ڈیسک) وزارت اوورسیز پاکستانیز کی خصوصی کاوشوں کے باعث پاکستانی ورکرز کیلئے یورپ کے دروازے کھل گئے۔

وفاقی وزیرچوہدری سالک حسین کاکہناہے کہ اٹلی سے آئندہ3 سال کیلئے پاکستان کیلئے ساڑھے 10 ہزار نوکریوں کا کوٹہ حاصل کرلیاگیاہے،اٹلی کا پاکستان کیلئے نوکریوں میں کوٹہ مختص کرنا اہم سنگ میل ہے ، اس کامیابی پرپوری قوم کو مبارکباد پیش کرتا ہوں۔

 وفاقی وزیر چوہدری سالک حسین کے مطابق طویل محنت کے بعد اٹلی میں پاکستانی ورک فورس کیلئے روزگار کے دروازے کھل رہے ہیں۔

ترجمان وزارت اوورسیز پاکستانیزکے مطابق وفاقی وزیر اوورسیز پاکستانیز چوہدری سالک حسین نے اٹلی سے پاکستان کیلئے نوکریوں میں کوٹہ الاٹ کرنے کی خصوصی درخواست کی، اگلے تین سال کیلئے 3 ہزار 500 پاکستانی ہر سال ورک ویزہ پر اٹلی جائیں گے،1500 پاکستانی سیزنل کوٹہ اور 2 ہزار نان سیزنل کوٹہ پر اٹلی جائیں گے۔

ترجمان وزارت اوورسیز پاکستانیزکے مطابق پاکستان کو شپ بریکنگ، ہاسپیٹیلی، ہیلتھ کئیر اور زراعت کے شعبوں میں نوکریوں کا کوٹہ الاٹ کیا گیا ہے، پاکستانی ہنرمند و نیم ہنرمند ورکرز ان شعبوں میں روزگار کیلئے اٹلی جائیں گے، پاکستان کیلئے ویلڈرز، ٹیکنیشن، شیف، ویٹرز، ہائوس کیپنگ، نرسنگ، میڈیکل ٹیکنیشن ، فارمنگ، کاشتکاری کے شعبوں میں روزگار کے مواقع موجود ہیں۔

 ترجمان وزارت اوورسیز پاکستانیز کے مطابق اٹلی یورپ کا پہلا ملک ہے جس نے پاکستان کیلئے نوکریوں میں کوٹہ الاٹ کیا،پاکستان اور اٹلی کے مابین جوائنٹ ورکنگ گروپ کا دوسرا اجلاس فروری 2026 میں اسلام آباد میں ہوگا۔

وفاقی وزیر چوہدری سالک حسین کاکہناہے کہ اٹلی کا پاکستان کیلئے نوکریوں میں کوٹہ مختص کرنا اہم سنگ میل، پوری قوم کو مبارکباد دیتا ہوں، طویل محنت کے بعد اٹلی میں پاکستانی ورک فورس کیلئے روزگار کے دروازے کھلنے جارہے ہیں، یہ پاکستان کے لیے یورپین لیبر مارکیٹ میں روزگار کے نئے مواقعوں کی تلاش میں اہم سنگِ میل ہے، حکومت پاکستان اپنے محنت کشوں کو عالمی سطح پر باعزت روزگار فراہم کرنے کے لیے مسلسل کوشاں ہے، اوورسیز پاکستانیز دنیا بھر میں پاکستان کے سفیر اور ملکی معیشت میں ریڑھ کی ہڈی کا کردار ادا کر رہے ہیں،جلد یورپ کے مزید ممالک کے دروازے پاکستانی ورک فورس کیلئے کھلیں گے۔