قائدِ اعظم کی جدوجہد، دیانت داری اور اصول پسندی ہماری رہنمائی کا مضبوط ذریعہ ہے: روحی بانو

وزیرآباد(جانوڈاٹ پی کے)بانی پاکستان قائدِ اعظم محمد علی جناحؒ کی 149ویں سالگرہ نہایت عقیدت، احترام اور شایانِ شان طریقے سے منائی گئی۔ اس خوبصورت اور باوقار تقریب کا اہتمام پاکستان پیپلز پارٹی وویمن ونگ فرانس کی صدر روحی بانو نے کیا۔ تقریب میں معروف انٹرنیشنل فیشن ڈیزائنر اور سمندر پار نیوز کی ڈائریکٹر نیناں خان، لیڈی فوکس، نجی ٹی وی اور اخبار کی ڈائریکٹر ناصرہ خان، معروف سماجی اور مذہبی شخصیت عالیہ مر تضیٰ، سا بق صدر منہاج القرآن انٹرنیشنل ستارہ ملک، پی پی پی وویمن ونگ کی جنرل سیکرٹری سارہ کرن، سینئر نائب صدر فرحت عاشق، نائب صدر فرح کریم، نائب صدر فردوس شفقت، پی ٹی آئی کی سینئر رہنما صائمہ بابری،معروف سماجی و مذہبی شخصیت رانی کنول سمیت تمام مکتبہ فکر سے تعلق رکھنے والی خواتین نے بھرپور شرکت کی۔روحی بانو نے بانی پاکستان قائد اعظم محمد علی جناح ؒ کی خدمات، جدوجہد اور افکار کو زبردست انداز میں خراجِ تحسین پیش کیا اور ان کی تعلیمات پر عمل کرنے کے عزم کا اعادہ کیا گیا۔سورت یاسین پڑھ کر بابائے قوم قائد اعظم محمد علی جناح کی روح کو بخشا گیا۔ پاکستان پیپلز پارٹی وویمن ونگ فرانس کی صدر روحی بانو نے کہا کہ قائدِ اعظم محمد علی جناحؒ کی جدوجہد، دیانت داری اور اصول پسندی آج بھی ہماری رہنمائی کا سب سے مضبوط ذریعہ ہے، خواتین کو بانی پاکستان کے افکار پر عمل کرتے ہوئے ملکی ترقی، جمہوریت اور سماجی انصاف کے فروغ میں اپنا بھرپور کردار ادا کرنا چاہیے۔ روحی بانو نے اس عزم کا اظہار بھی کیا کہ پاکستان پیپلز پارٹی وویمن ونگ بیرونِ ملک بھی قائدِ اعظم ؒ کے نظریات اور پاکستان کی مثبت شناخت کو اجاگر کرتی رہے گی۔تقریب میں رانی کنول کا تیار کردہ ٹیبلو پیش کیا جسے سب بے بہت پسند کیا اور رانی کنول کی پیشکش کو سراہا قائد اعظم ؒ زندہ باد کے فلک شگاف نعروں کے ساتھ قائد اعظم ؒکی 149 ویں سالگرہ کا کیک کاٹا گیا پیرس کے معروف سماجی اور کاروباری شخصیت چوہدری عارف کی جانب سے سبکی ضیافت کی گئی۔