امریکی صدر ڈونلڈ ٹرمپ کااہم اعلان:ہر شہری کو 2 ہزار ڈالر بطور ڈیویڈنڈ ملیں گے

واشنگٹن (جانو ڈاٹ پی کے) امریکی صدر ڈونلڈ ٹرمپ نے کہا ہے کہ امریکا کو ٹیرف سے حاصل ہونے والی آمدن میں سے زیادہ تر رقم شہریوں میں بطور ڈیویڈنڈ تقسیم کی جائے گی، اور ہر شہری کو کم از کم 2 ہزار ڈالر دیے جائیں گے۔

صدر ٹرمپ نے اتوار کو اپنے سوشل میڈیا پلیٹ فارم ٹروتھ سوشل (Truth Social) پر ایک پوسٹ میں یہ اعلان کیا۔ ان کا کہنا تھا کہ زیادہ آمدن والے امریکی اس اسکیم سے مستفید نہیں ہوں گے۔

ٹرمپ نے لکھا کہ ہم کھربوں ڈالر حاصل کر رہے ہیں اور بہت جلد اپنے 37 کھرب ڈالر کے بھاری قرضے کی ادائیگی شروع کریں گے۔ ہر شخص کو (زیادہ آمدنی والے افراد کے علاوہ) کم از کم 2 ہزار ڈالر ادا کیے جائیں گے۔

غیر ملکی میڈیا رپورٹس کے مطابق، امریکی سپریم کورٹ اس وقت ٹرمپ کے نافذ کردہ تجارتی ٹیرف کے قانونی جواز کا جائزہ لے رہی ہے، کیونکہ اس سے قبل ماتحت عدالتیں ان میں سے کئی محصولات کو غیر قانونی قرار دے چکی ہیں۔

یاد رہے کہ اکتوبر میں ٹرمپ نے ایک انٹرویو میں عوام کے لیے ایک سے دو ہزار ڈالر کی رقم تقسیم کرنے کی تجویز پیش کی تھی۔ ان کے مطابق، ان کے نافذ کردہ محصولات سے امریکا کو سالانہ ایک کھرب ڈالر سے زائد آمدنی حاصل ہو سکتی ہے۔