پاکستان نے جنوبی افریقا کیخلاف تیسرا ٹی ٹوئنٹی جیت کر سیریز 1-2 سے اپنے نام کرلی

لاہور(جانوڈاٹ پی کے) پاکستان نے جنوبی افریقا کو 4 وکٹوں سے شکست دے کر ٹی 20 سیریز 2-1 سے اپنے نام کرلی۔قذافی اسٹیڈیم میں کھیلے گئے میچ میں پاکستان نے جنوبی افریقا کی جانب سے دیا جانے والا 140 رنز کا ہدف 6 وکٹوں کے نقصان پر 19 اوورز میں حاصل کرلیا۔

بابر اعظم نے 47 گیندوں پر 68 رنز کی میچ وننگ اننگز کھیلی، کپتان سلمان علی آغا 33 اور صاحبزادہ فرحان نے 19 رنز بنائے، محمد نواز بغیر کوئی رن بنائے آؤٹ ہوئے، حسن نواز نے 5 رنز بنائے، اوپنر صائم ایوب بغیر کوئی رن بنائے پویلین لوٹ گئے۔

جنوبی افریقا کی جانب سے کوربن بوش اورلیزا ڈولیمز نے دو، دو وکٹیں حاصل کیں۔

اس سے قبل جنوبی افریقا نے پہلے بیٹنگ کرتے ہوئے مقررہ اوورز میں 9 وکٹوں کے نقصان پر 139 رنز بنائے اور پاکستان کو جیت کے لیے 140 رنز کا ہدف دیا تھا۔

ریزا ہیڈرکس 34 اور ڈونوون فریرا 29 رنز بنا کر نمایاں رہے۔کوربن بوش نے 30 رنز کی اننگز کھیلی اور ڈیوڈ بریوس نے 21 رنز اسکور کیے۔

پاکستان کی جانب سے شاہین آفریدی نے تین کھلاڑیوں کو آؤٹ کیا، عثمان طارق اور فہیم اشرف نے دو، دو وکٹیں حاصل کیں۔

پاکستان ٹیم نے دو تبدیلیاں کی ہیں نسیم شاہ کی جگہ شاہین آفریدی کی واپسی ہوئی ہے جبکہ ابرار احمد کی جگہ عثمان طارق ڈیبیو کررہے ہیں۔جنوبی افریقا کی ٹیم میں تین تبدیلیاں کی گئی ہیں۔