پاک افغان ڈائیلاگ،افغان مذاکراتی وفد وزیر دفاع کی قیادت میں دوحہ روانہ

کابل (جانوڈاٹ پی کے)ترجمان افغان حکومت ذبیح اللہ مجاہد نے کہاہے کہ دوحہ میں مذاکرت کے لیے وزیردفاع مولوی محمدیعقوب قطر رونہ ہوگئے ہیں۔

ہفتہ کوترجمان افغان حکومت ذبیح اللہ مجاہد نے ایکس پر جاری بیان میں کہاکہ جیسا کہ پہلے طے پایا تھا، آج دوحہ میں پاکستانی فریق کے ساتھ مذاکرات ہونے جا رہے ہیں۔ اس سلسلے میں، اسلامی امارت کا ایک اعلی سطحی وفد، وزیرِ دفاع مولوی محمد یعقوب مجاہدکی قیادت میں دوحہ روانہ ہو چکا ہے۔

تاہم گزشتہ شب پاکستانی فوج نے ایک بار پھر صوبہ پکتیکا کے شہری علاقوں پر فضائی حملے کیے، جن کے نتیجے میں متعدد شہری شہید اور زخمی ہوئے۔اسلامی امارت ان بار بار ہونے والے جرائم اور افغانستان کی خودمختاری کی خلاف ورزی کی شدید ترین الفاظ میں مذمت کرتی ہے۔ ایسے اقدامات اشتعال انگیز ہیں اور دانستہ طور پر تنازع کو طول دینے کی کوشش کے مترادف ہیں۔

انہوں نے لکھاکہ اگرچہ اسلامی امارت کو ان خلاف ورزیوں کا جواب دینے کا حق حاصل ہے، لیکن اپنی مذاکراتی ٹیم کے وقار اور عزت کو برقرار رکھنے کے لیے، اس کے مجاہدین کو اس وقت کسی نئی فوجی کارروائی سے باز رہنے کی ہدایت کی گئی ہے۔ہم ایک بار پھر تاکید کرتے ہیں کہ افغانستان پرامن حل اور علاقائی استحکام کے لیے پرعزم ہے۔ تاہم، حالیہ واقعات کی تمام تر ذمہ داری مکمل طور پر پاکستان پر عائد ہوتی ہے۔