امیتابھ بچن کے گھر اور دلجیت دوسانجھ کے کنسرٹ پر حملے کی دھمکیاں، ممبئی میں سیکیورٹی ہائی الرٹ

ممبئی (جانو ڈاٹ پی کے)بھارتی شہر ممبئی میں بالی ووڈ اداکار امیتابھ بچن کی رہائش گاہ اور پنجابی گلوکار دلجیت دوسانجھ کے کنسرٹ کو نشانہ بنانے کی دھمکیاں موصول ہونے کے بعد سیکیورٹی سخت کردی گئی ہے۔ بھارتی میڈیا کے مطابق یہ پیش رفت ایسے وقت میں سامنے آئی ہے جب حال ہی میں اداکار ٹائیگر شروف سے متعلق فائرنگ کا واقعہ بھی رپورٹ ہوا تھا۔

رپورٹس کے مطابق ممبئی کے میئر کے دفتر کو ایک دھمکی آمیز ای میل موصول ہوئی، جس میں امیتابھ بچن کے بنگلے ’جلسہ‘ پر حملے اور نومبر میں ہونے والے دلجیت دوسانجھ کے کنسرٹ کے دوران سیکیورٹی میں خلل ڈالنے کی دھمکی دی گئی تھی۔

ای میل موصول ہونے کے بعد ممبئی پولیس اور متعلقہ اداروں نے فوری کارروائی کرتے ہوئے نشاندہی کیے گئے مقامات کی تلاشی لی اور حفاظتی انتظامات کا جائزہ لیا۔ ابتدائی جانچ کے دوران کسی مشکوک شے یا فوری خطرے کی تصدیق نہیں ہوسکی۔

حالیہ سیکیورٹی واقعات کے پیش نظر قانون نافذ کرنے والے اداروں نے معروف فلمی شخصیات کی رہائش گاہوں اور بڑے ثقافتی اجتماعات کے مقامات پر حفاظتی اقدامات مزید سخت کردیے ہیں۔ تاہم دھمکی آمیز ای میل میں کیے گئے دعوؤں کی آزادانہ تصدیق سامنے نہیں آئی۔