ایمرجنسی کے بعد وزیراعظم شہباز شریف کا پہلا دورہ پشاور، سکیورٹی اور سیاسی صورتحال پر اہم اجلاس طلب

اسلام آباد(جانوڈاٹ پی کے) وزیراعظم شہباز شریف آج  ایمرجنسی کے نفاذ کے بعد پہلی مرتبہ پشاور کا دورہ کریں گے، جہاں وہ خیبر پختونخوا کی سکیورٹی، سیاسی صورتحال، انتظامی امور اور ترقیاتی منصوبوں سے متعلق اعلیٰ سطح کے اجلاس کی صدارت کریں گے۔

حکومتی ذرائع کے مطابق وزیراعظم کو خیبر پختونخوا کی مجموعی صورتحال، امن و امان، انتظامی معاملات اور جاری ترقیاتی منصوبوں کے حوالے سے تفصیلی بریفنگ دی جائے گی۔

ذرائع کا کہنا ہے کہ وزیراعظم شہباز شریف کی زیر صدارت گورنر ہاؤس پشاور میں اعلیٰ سطح کا اجلاس منعقد ہوگا، جس میں صوبے کو درپیش اہم مسائل اور حالیہ پیش رفت کا جائزہ لیا جائے گا۔

اجلاس میں خیبر پختونخوا میں امن و استحکام کے قیام، دہشت گردی کے خاتمے اور سکیورٹی صورتحال بہتر بنانے کے لیے کیے جانے والے اقدامات پر بھی غور کیا جائے گا۔ اس کے علاوہ صوبے کے انتظامی امور اور جاری و مجوزہ ترقیاتی منصوبوں پر پیش رفت کا جائزہ لیا جائے گا۔

وزیراعظم کے ہمراہ نائب وزیراعظم و وزیر خارجہ اسحاق ڈار اور وفاقی وزیر داخلہ محسن نقوی بھی پشاور جائیں گے۔ اعلیٰ سطح کے اجلاس میں صوبے کی سکیورٹی ضروریات اور وفاقی و صوبائی سطح پر تعاون سے متعلق امور بھی زیر بحث آنے کا امکان ہے۔

وزیراعظم کا یہ دورہ خیبر پختونخوا میں سکیورٹی، انتظامی اور سیاسی صورتحال کے تناظر میں اہمیت کا حامل ہے، جہاں اجلاس کے دوران امن و امان کی بہتری، دہشت گردی کے خلاف اقدامات اور ترقیاتی سرگرمیوں کے حوالے سے اہم معاملات کا جائزہ لیا جائے گا۔