امریکا ایران مذاکرات ناکام؟ روبیو کا ایرانی وفد کو ملک چھوڑنے کا حکم

واشنگٹن (جانو ڈاٹ پی کے)امریکا اور ایران کے درمیان سفارتی مذاکرات میں پیش رفت نہ ہونے کے بعد کشیدگی ایک بار پھر بڑھ گئی، امریکی حکام کے مطابق امریکی وزیر خارجہ مارکو روبیو نے اقوام متحدہ کی جنرل اسمبلی میں شرکت کے لیے نیویارک آنے والے ایرانی وفد، جس میں وزیر خارجہ عباس عراقچی بھی شامل تھے، کو امریکا چھوڑنے کی ہدایت کردی۔امریکی ذرائع کے مطابق امریکی مشن نے پیر کی شام ایرانی مشن کو آگاہ کیا کہ عباس عراقچی سمیت وفد نیویارک سے فوری طور پر روانہ ہو۔ امریکی حکام کا کہنا تھا کہ جنرل اسمبلی کا اجلاس ختم ہوچکا تھا اور ایرانی وفد کا قیام مزید ضروری نہیں رہا تھا۔

رپورٹس کے مطابق ایرانی وفد منگل کی علی الصبح نیویارک سے دوحہ روانہ ہوگیا، جہاں سے عباس عراقچی کی تہران واپسی متوقع تھی۔ امریکی حکام کے مطابق وائٹ ہاؤس کو پیر کی صبح مذاکرات میں ممکنہ پیش رفت کی امید تھی، تاہم دن گزرنے کے ساتھ واضح ہوگیا کہ بات چیت تعطل کا شکار ہوچکی ہے۔

مذاکرات میں آبنائے ہرمز، جنگ کے خاتمے اور ایران کے جوہری پروگرام سے متعلق معاملات زیر بحث رہے ہیں۔ حالیہ دنوں میں قطر دونوں ممالک کے درمیان بالواسطہ رابطوں میں ثالثی کر رہا ہے، جبکہ علاقائی ذرائع کے مطابق قطری ثالث اب بھی کسی سمجھوتے کی تجویز پر دونوں فریقوں سے رابطے میں ہیں۔