غزہ میں اسرائیلی کارروائیوں پر ہسپانوی وزیراعظم کی سخت تنقید

نیویارک (ویب ڈیسک) ہسپانوی وزیراعظم پیڈرو سانچیز نے غزہ میں جاری اسرائیلی فوجی کارروائیوں پر سخت تنقید کرتے ہوئے کہا ہے کہ اسرائیلی وزیراعظم بنیامین نیتن یاہو خطے میں اجتماعی قتل کا سلسلہ جاری رکھے ہوئے ہیں۔

اقوام متحدہ کی جنرل اسمبلی کے 81ویں اجلاس سے خطاب کرتے ہوئے پیڈرو سانچیز نے کہا کہ اسپین غزہ کی صورتحال کے ردعمل میں اسرائیل کے خلاف پابندیوں سمیت متعدد اقدامات کر چکا ہے، جبکہ مزید اقدامات پر بھی غور کیا جا رہا ہے۔

ہسپانوی وزیراعظم نے کہا کہ ان کی حکومت غزہ کی جنگ کے تناظر میں اسرائیلی پالیسیوں پر اپنے تحفظات کا اظہار کرتی رہی ہے۔ اس سے قبل اسپین اسرائیل کو ہتھیاروں کی برآمدات محدود کرنے اور بعض فوجی تعاون روکنے جیسے اقدامات بھی کر چکا ہے۔

پیڈرو سانچیز نے اقوام متحدہ کے سیکرٹری جنرل انتونیو گوتیرس سے بھی ملاقات کی، جس میں غزہ اور مشرق وسطیٰ کی مجموعی صورتحال پر تبادلہ خیال کیا گیا۔ ہسپانوی وزیراعظم کے دفتر کے مطابق دونوں رہنماؤں نے جاری تنازعات کے تناظر میں بین الاقوامی تعاون مزید مضبوط بنانے کی ضرورت پر زور دیا۔

دوسری جانب انتونیو گوتیرس نے جنرل اسمبلی سے خطاب میں غزہ کی انسانی صورتحال پر تشویش کا اظہار کرتے ہوئے جنگ بندی، انسانی امداد میں اضافے اور بین الاقوامی قانون کے احترام پر زور دیا۔

اقوام متحدہ کے سیکرٹری جنرل نے کہا کہ غزہ میں جاری خونریزی اور تباہی کی شدت ان کے دورِ سیکرٹری جنرل کے دوران دیکھی جانے والی بدترین مثالوں میں شامل ہے۔