ایران کو جوہری ہتھیار حاصل کرنے کی اجازت نہیں دی جاسکتی،جے ڈی وینس

واشنگٹن (جانو ڈاٹ پی کے) امریکی نائب صدر جے ڈی وینس نے کہا ہے کہ ایران کو جوہری ہتھیار حاصل کرنے کی اجازت نہیں دی جاسکتی، جبکہ صدر ڈونلڈ ٹرمپ نے ایران کو جوہری ہتھیاروں کے حصول سے روکنے کے لیے کارروائی کی۔

میڈیا سے گفتگو کرتے ہوئے جے ڈی وینس نے کہا کہ ایران نے امریکی کارروائی کے جواب میں عالمی بحری جہازوں کو خوفزدہ کیا، جس کے باعث توانائی کی قیمتیں بلند ہیں۔

امریکی نائب صدر کا کہنا تھا کہ حکومت توانائی کی قیمتیں کم کرنے اور عوام کو فوری ریلیف فراہم کرنے کے لیے ہر ممکن کوشش کر رہی ہے۔

جے ڈی وینس نے میڈیا سے متعلق معاملات پر بھی مؤقف اختیار کیا کہ صدر ٹرمپ میڈیا اداروں پر پابندی عائد نہیں کر رہے بلکہ ایسے میڈیا اداروں کو خصوصی رسائی نہ دینے کا فیصلہ کیا گیا ہے جنہیں انتظامیہ پروپیگنڈا کرنے والا سمجھتی ہے۔

انہوں نے مزید کہا کہ ایران کا جوہری ہتھیار حاصل کرنا خطے اور دنیا میں جوہری ہتھیاروں کی دوڑ میں اضافے کا سبب بن سکتا ہے۔ ان کے مطابق اسی وجہ سے امریکا ایران کے جوہری پروگرام کے معاملے کو بنیادی اہمیت دے رہا ہے۔