کڑیو گھنور میں اسماعیل راہو اور ڈاکٹر شام سندر آڈوانی کے اعزاز میں تقریب

بدین (رپورٹ: مرتضیٰ میمن\جانوڈاٹ پی کے) کڑیو گھنور میں ٹریڈرز ایسوسی ایشن کی جانب سے صوبائی وزیر برائے جامعات و بورڈز اسماعیل راہو اور وزیراعلیٰ سندھ کے معاونِ خصوصی برائے اقلیتی امور و چیئرمین سندھ ایویکیو ٹرسٹ پراپرٹی بورڈ ایم پی اے ڈاکٹر شام سندر آڈوانی کے اعزاز میں استقبالیہ اور عشائیے کا اہتمام کیا گیا۔

تقریب میں تاجر برادری، سیاسی و سماجی رہنماؤں اور علاقے کی معزز شخصیات نے بڑی تعداد میں شرکت کی۔ اس موقع پر خطاب کرتے ہوئے اسماعیل راہو نے کہا کہ کڑیو گھنور، شہید فاضل راہو اور ضلع بدین کے عوام کو بنیادی سہولیات کی فراہمی کے لیے ہر ممکن اقدامات جاری رکھے جائیں گے۔

صوبائی وزیر نے ڈاکٹر شام سندر آڈوانی کی اقلیتی برادری کے مسائل کے حل کے لیے کوششوں کو بھی سراہا۔

تقریب سے خطاب کرتے ہوئے ڈاکٹر شام سندر آڈوانی نے سندھ کی وحدت اور تاریخی و ثقافتی شناخت پر گفتگو کرتے ہوئے کہا کہ سندھ ایک تھا، ایک ہے اور ایک ہی رہے گا۔ انہوں نے کہا کہ سندھ کی تقسیم کسی صورت قبول نہیں کی جائے گی۔

انہوں نے سندھ کی صوفیانہ روایات کا ذکر کرتے ہوئے کہا کہ شاہ عبداللطیف بھٹائی، سچل سرمست اور سامی کی فکر نے سندھ کی ثقافت اور معاشرت کو گہرے اثرات دیے ہیں۔ ان کے مطابق سندھ کی ترقی کے ساتھ پاکستان کی ترقی بھی وابستہ ہے۔

ڈاکٹر شام سندر آڈوانی نے بتایا کہ ضلع بدین میں ہندو برادری کے لیے مجموعی طور پر 22 ترقیاتی اسکیمیں رکھی گئی ہیں، جبکہ کڑیو گھنور میں 3 اسکیموں پر آئندہ ماہ سے کام شروع کیا جائے گا۔

انہوں نے کڑیو گھنور کی تاریخی درگاہ سائیں محمود فقیر پر اقلیتی فنڈ سے کمیونٹی ہال تعمیر کرنے کا اعلان بھی کیا۔

معاونِ خصوصی نے کہا کہ سندھ کی تاریخ میں مسلمان اور ہندو صوفیا کی تعلیمات میں رواداری اور انسان دوستی نمایاں رہی ہے۔ انہوں نے کہا کہ بھائی چارے اور رواداری کی روایت کو آگے بڑھانا ضروری ہے۔

انہوں نے مزید اعلان کیا کہ دیوالی کے موقع پر سندھ میں ہندو برادری کے مستحق خاندانوں کی مالی معاونت کی جائے گی، جس میں کڑیو گھنور کے مستحق شہری بھی شامل ہوں گے۔

تقریب میں محمد اسلم راہو، کیلاش کمار، گھنشام داس، لالو مالہی، نریش کمار اور دلیپ کمار سمیت تاجر تنظیموں کے نمائندوں، سیاسی و سماجی رہنماؤں اور شہریوں نے شرکت کی۔