ٹرمپ اور شی جن کی ملاقات سے قبل امریکا اور چین کے درمیان تجارتی و اے آئی مذاکرات نیویارک میں شروع ہوگئے
نیویارک (ویب ڈیسک) امریکا اور چین کے اعلیٰ حکام کے درمیان تجارت، مصنوعی ذہانت اور دیگر اہم امور پر مذاکرات نیویارک میں شروع ہوگئے ہیں، جن کا مقصد دونوں ممالک کے صدور کی متوقع ملاقات سے قبل ممکنہ معاہدوں کے لیے پیش رفت کرنا ہے۔
مذاکرات میں امریکی وزیر خزانہ اسکاٹ بیسنٹ، چینی نائب وزیراعظم حہ لی فینگ اور امریکی صدر کے اعلیٰ تجارتی نمائندے جیمیسن گریئر شریک ہیں۔ مذاکرات کا اجلاس نیویارک میں جے پی مورگن چیس کے ہیڈکوارٹرز میں ہو رہا ہے اور اس کے پورا دن جاری رہنے کی توقع ہے۔
یہ مذاکرات امریکی صدر ڈونلڈ ٹرمپ اور چینی صدر شی جن پنگ کے درمیان جمعرات کو وائٹ ہاؤس میں متوقع ملاقات سے قبل ہو رہے ہیں۔ فریقین کی جانب سے تجارت، ٹیکنالوجی اور دیگر تزویراتی معاملات پر جاری کشیدگی میں کمی کے امکانات پر بات چیت کی جائے گی۔
مذاکرات میں نومبر میں ختم ہونے والی عارضی تجارتی جنگ بندی میں ممکنہ توسیع اور مصنوعی ذہانت کی ترقی کے لیے ضابطہ کار وضع کرنے سمیت مختلف امور زیرِ بحث آنے کا امکان ہے۔
مذاکرات سے قبل اسکاٹ بیسنٹ نے صحافیوں سے گفتگو کرتے ہوئے کہا کہ وہ ’’مرکوز، جامع اور تعمیری مذاکرات‘‘ کے منتظر ہیں، جو دونوں ممالک کے رہنماؤں کی ملاقات کے لیے بنیاد فراہم کریں گے۔
امریکی حکام کی جانب سے نایاب زمینی دھاتوں سے تیار ہونے والے میگنیٹس اور اہم معدنیات کی مسلسل فراہمی یقینی بنانے کا معاملہ بھی مذاکرات میں اٹھائے جانے کا امکان ہے، کیونکہ یہ امریکی صنعت اور مینوفیکچرنگ کے لیے اہم سمجھے جاتے ہیں۔
