امریکا سے استعمال شدہ تیل کا سامان وینزویلا پہنچنے لگا، صنعت کی بحالی کی کوششیں تیز

نیویارک (ویب ڈیسک) امریکا میں استعمال شدہ اور نیلام کیا جانے والا تیل کے شعبے کا پرانا سامان وینزویلا کی تیل صنعت کی بحالی کے لیے استعمال ہونے لگا ہے، جہاں طویل عرصے سے کم سرمایہ کاری اور پابندیوں کے باعث متاثر ہونے والی پیداوار دوبارہ بڑھانے کی کوششیں جاری ہیں۔

غیر ملکی خبر رساں ادارے کے مطابق ٹیکساس، اوکلاہوما، کولوراڈو سمیت مختلف امریکی ریاستوں سے پرانے ٹرک، ڈرلنگ رِگز، پمپس، والو اسٹیشنز، ویلڈنگ کا سامان اور دیگر آلات اکٹھے کرکے وینزویلا بھیجے جا رہے ہیں۔

یہ سرگرمیاں ایسے وقت میں تیز ہوئی ہیں جب امریکی کاروباری ادارے وینزویلا کی تیل صنعت کی بحالی کے لیے واشنگٹن کی پالیسی میں بڑی تبدیلی کے بعد ممکنہ 100 ارب ڈالر کے تعمیرِ نو منصوبے سے فائدہ اٹھانے کی کوشش کر رہے ہیں۔

وینزویلا کی سرکاری تیل کمپنی پی ڈی وی ایس اے کے مطابق ملک میں تیل کی صنعت کو ڈرلنگ رِگز، پمپس، والو اسٹیشنز اور دیگر ضروری آلات کی شدید ضرورت ہے۔

ہیوسٹن کے قریب ہیومبل میں قائم ایک شپنگ یارڈ سے یہ سامان وینزویلا کی اہم تیل بندرگاہوں گوانتا اور ماراکائیبو منتقل کیا جا رہا ہے۔ شپنگ کمپنی کے مطابق سال کے اختتام تک اس کی گنجائش مکمل طور پر استعمال ہونے کی توقع ہے جبکہ مزید بحری جہازوں کے لیے بھی آرڈرز موصول ہوچکے ہیں۔

رپورٹ کے مطابق ورک اوور رِگز سے بھرے کنٹینرز گزشتہ ہفتے ماراکائیبو پہنچے، جبکہ آئندہ دو شپمنٹس میں 1500 ہارس پاور کے دو بڑے رِگز بھی وینزویلا بھیجے جانے کی توقع ہے، جو کمپنی کے مطابق اب تک بھیجے جانے والے سب سے بڑے رِگز ہوں گے۔

تاہم استعمال شدہ سامان کی حالت کے باعث اس کی کارکردگی اور قابلِ اعتماد ہونے پر سوالات بھی موجود ہیں۔ وینزویلا کے لیے آلات خریدنے میں شامل سرمایہ کار جیسی کول کا کہنا ہے کہ بعض اوقات بہترین سامان دستیاب ہوجاتا ہے جبکہ بعض مواقع پر انتہائی خراب حالت کی مشینری بھی ملتی ہے۔

دوسری جانب توانائی کمپنیوں شیورون اور ایس ایل بی سمیت دیگر اداروں کے حکام کا کہنا ہے کہ وینزویلا کے مشکل تیل والے علاقوں، خصوصاً جھیل ماراکائیبو اور وسیع اورینوکو بیلٹ میں پیداوار بڑھانے کے لیے زیادہ طاقتور اور جدید آلات کی ضرورت ہوگی۔

وینزویلا کی تیل پیداوار 1990 کی دہائی کے آخر میں 30 لاکھ بیرل یومیہ سے زیادہ تھی، تاہم کئی دہائیوں کی کم سرمایہ کاری، بدعنوانی اور غیر ملکی پابندیوں کے بعد اب یہ تقریباً 12 لاکھ 50 ہزار بیرل یومیہ رہ گئی ہے۔

یوں امریکا سے استعمال شدہ تیل کے آلات کی بڑھتی ہوئی ترسیل وینزویلا کی طویل عرصے سے مشکلات کا شکار تیل صنعت کو دوبارہ فعال کرنے کی کوششوں کی اہم علامت بن گئی ہے۔