ریت کے سمندر میں رفتار کا جنون! متحدہ عرب امارات میں اونٹ دوڑ صحرائی ثقافت کی شان بن گئی
ابوظہبی (جانو ڈاٹ پی کے): متحدہ عرب امارات میں اونٹ دوڑ محض ایک کھیل نہیں بلکہ ملکی شناخت، صحرائی ثقافت اور صدیوں پرانی روایات کی زندہ علامت سمجھی جاتی ہے، جس کے ذریعے نئی نسل اپنے آباؤ اجداد کی روایات اور اقدار سے جڑی ہوئی ہے۔
غیر ملکی میڈیا رپورٹ کے مطابق اماراتی معاشرے میں اونٹوں کو نسلوں سے خصوصی مقام حاصل رہا ہے، جبکہ اونٹ دوڑ کو صبر، عزم، سخاوت اور اپنی سرزمین سے وابستگی کی علامت سمجھا جاتا ہے۔
جدید دور میں متحدہ عرب امارات نے اس قدیم روایت کو ختم ہونے کے بجائے جدید سہولیات اور منظم نظام کے ذریعے مزید فروغ دیا ہے۔ ملک میں جدید ریسنگ ٹریکس، خصوصی مراکز، بڑے مقابلوں، ویٹرنری سہولیات اور ادارہ جاتی انتظام کے ذریعے اونٹ دوڑ کو ایک باقاعدہ کھیل کے ساتھ ساتھ اہم ثقافتی سرگرمی کے طور پر بھی برقرار رکھا گیا ہے۔
دبئی کا المرموم اور ابوظبی کا الوثبہ اونٹ دوڑ کے نمایاں مراکز میں شمار ہوتے ہیں، جہاں بڑے پیمانے پر مقابلوں کا انعقاد کیا جاتا ہے اور شائقین روایتی کھیل سے لطف اندوز ہوتے ہیں۔
اونٹ دوڑ نے متحدہ عرب امارات کی سرحدوں سے نکل کر عالمی سطح پر بھی پذیرائی حاصل کی ہے۔ اماراتی ثقافتی ورثے کے مختلف عناصر، جن میں اونٹ دوڑ بھی شامل ہے، یونیسکو کے غیر مادی ثقافتی ورثے سے متعلق فہرستوں میں جگہ بنا چکے ہیں۔
یوں ریت کے وسیع میدانوں میں دوڑتے اونٹ آج بھی متحدہ عرب امارات کے ماضی، حال اور ثقافتی شناخت کے درمیان ایک مضبوط رشتہ قائم کیے ہوئے ہیں۔
