فیلڈ مارشل عاصم منیر کا دورۂ چین، اعلیٰ قیادت سے ملاقاتیں، دوطرفہ تعلقات مزید مستحکم

بیجنگ (مانیٹرنگ ڈیسک): سپہ سالارِ پاکستان فیلڈ مارشل جنرل سید عاصم منیر نے عوامی جمہوریہ چین کا اہم سرکاری دورہ کیا، جس دوران انہوں نے چینی سیاسی و عسکری قیادت سے علیحدہ علیحدہ ملاقاتیں کیں۔ ملاقاتوں میں دوطرفہ تعلقات، دفاعی تعاون اور علاقائی امن سے متعلق مختلف امور پر تبادلہ خیال کیا گیا۔

آئی ایس پی آر کے مطابق فیلڈ مارشل عاصم منیر نے چینی نائب صدر ہان ژینگ اور وزیر خارجہ وانگ ژی سے ملاقاتیں کیں۔ ان ملاقاتوں میں بدلتی ہوئی عالمی و علاقائی صورتحال، سی پیک کے تحت جاری منصوبے، اور باہمی اسٹریٹیجک تعاون پر تفصیلی گفتگو ہوئی۔

دونوں ممالک نے اس موقع پر خودمختاری، کثیرالجہتی تعاون اور علاقائی استحکام کے لیے اپنے عزم کا اعادہ کیا۔ چینی قیادت نے جنوبی ایشیا میں پاکستان کے کردار اور پاک افواج کی پیشہ ورانہ صلاحیتوں کو سراہا۔

فوجی سطح پر فیلڈ مارشل نے جنرل ژانگ یوشیا (وائس چیئرمین، سینٹرل ملٹری کمیشن)، جنرل چن ہوئی (سیاسی کمشنر، پی ایل اے آرمی) اور لیفٹیننٹ جنرل کائی زائی جن (چیف آف اسٹاف، پی ایل اے آرمی) سے بھی اہم ملاقاتیں کیں۔

پیپلز لبریشن آرمی ہیڈکوارٹرز آمد پر فیلڈ مارشل کو گارڈ آف آنر پیش کیا گیا، جو دونوں ممالک کے دیرینہ عسکری تعلقات کی علامت تھا۔

ملاقاتوں میں انسداد دہشت گردی، دفاعی مشقیں، ٹیکنالوجی میں اشتراک اور ادارہ جاتی روابط کو مزید فروغ دینے پر زور دیا گیا۔ دونوں افواج کے درمیان ہائبرڈ خطرات اور سرحد پار چیلنجز سے نمٹنے کے لیے آپریشنل ہم آہنگی کو بڑھانے پر بھی اتفاق کیا گیا۔

چینی عسکری قیادت نے پاکستان کے ساتھ دفاعی شراکت داری پر مکمل اعتماد کا اظہار کرتے ہوئے اس عزم کا اعادہ کیا کہ علاقائی امن میں پاکستان کا کردار کلیدی ہے۔

فیلڈ مارشل عاصم منیر نے چین کی مستقل حمایت پر اظہار تشکر کرتے ہوئے کہا کہ پاکستان، چین کے ساتھ اسٹریٹیجک تعاون کو مزید وسعت دینے کے لیے پرعزم ہے۔

فوجی ترجمان کے مطابق فیلڈ مارشل کا یہ دورہ پاکستان اور چین کے گہرے سیاسی و دفاعی تعلقات کی ایک اور روشن مثال ہے، جو خطے میں امن و استحکام کے لیے دونوں ممالک کی مشترکہ کاوشوں کو تقویت دیتا ہے۔