ٹیسلا کی نئی روڈسٹر کی حیران کن رونمائی، ہوا میں چھلانگ اور فضائی گردش کا مظاہرہ
کیلیفورنیا (جانو ڈاٹ پی کے)ٹیسلا کی نئی روڈسٹر کی حیران کن رونمائی، ہوا میں چھلانگ اور فضائی گردش کا مظاہرہ۔
امریکی کمپنی ٹیسلا کی نئی نسل کی روڈسٹر اسپورٹس کار کے مظاہرے میں کمپریسڈ ایئر تھرسٹرز کی مدد سے گاڑی کو ریمپ سے ہوا میں اچھلتے، فضائی گردش کرتے اور دوبارہ زمین پر اترتے دکھایا گیا۔ کمپنی نے اسے اپنی جدید ٹیکنالوجی اور انجینئرنگ صلاحیتوں کی نمائش کے طور پر پیش کیا ہے۔
نئی روڈسٹر میں اسپیس ایکس کی راکٹ ٹیکنالوجی سے متاثرہ تھرسٹرز استعمال کیے گئے ہیں، جن میں کمپریسڈ ایئر سسٹم اور تقریباً 10 نوزلز شامل ہیں۔ مظاہرے کے دوران گاڑی نے ریمپ پر الٹی سمت میں چلنے، ہوا میں چھلانگ لگانے اور گھومنے کے بعد زمین پر اترنے کا مظاہرہ کیا۔
تاہم یہ مظاہرہ اس بات کا ثبوت نہیں کہ گاڑی طیارے یا ہیلی کاپٹر کی طرح مسلسل پرواز کرسکتی ہے۔ ٹیسلا کے مطابق روڈسٹر صفر سے 60 میل فی گھنٹہ کی رفتار ایک سیکنڈ سے بھی کم وقت میں حاصل کرسکتی ہے، جبکہ اس کی زیادہ سے زیادہ رفتار 230 میل فی گھنٹہ سے زائد بتائی گئی ہے۔
ایلون مسک کے مطابق گاڑی کی پیداوار 2028 میں شروع کرنے کا منصوبہ ہے۔ روڈسٹر کا تصور پہلی مرتبہ 2017 میں پیش کیا گیا تھا اور اس کی ڈیلیوری 2020 میں شروع کرنے کا وعدہ کیا گیا تھا، تاہم منصوبہ متعدد مرتبہ تاخیر کا شکار ہوا۔
