آبنائے ہرمز میں آئل ٹینکر سمندری بارودی سرنگ سے ٹکرا گیا، دھماکے کے بعد آگ بھڑک اٹھی
تہران (ویب ڈیسک) پاسدارانِ انقلاب نے دعویٰ کیا ہے کہ آبنائے ہرمز سے گزرنے والا ایک آئل ٹینکر سمندری بارودی سرنگ سے ٹکرا گیا، جس کے نتیجے میں دھماکا ہوا اور جہاز میں شدید آگ بھڑک اٹھی۔
ایرانی سرکاری میڈیا کے مطابق پاسدارانِ انقلاب کی جانب سے جاری بیان میں واقعے کی اطلاع دی گئی، تاہم حادثے کے مقام، وقت اور دیگر حالات سے متعلق مزید تفصیلات فراہم نہیں کی گئیں۔
رپورٹ کے مطابق متاثرہ آئل ٹینکر کی شناخت، اس پر سوار عملے کی تعداد اور ممکنہ جانی یا مالی نقصان کے بارے میں بھی تاحال کوئی معلومات سامنے نہیں آئی ہیں۔
آبنائے ہرمز عالمی سطح پر تیل کی ترسیل کے لیے ایک اہم بحری گزرگاہ ہے، جہاں کسی بھی قسم کا سکیورٹی واقعہ بین الاقوامی بحری تجارت اور توانائی کی ترسیل کے حوالے سے تشویش پیدا کر سکتا ہے۔
تاہم، آئل ٹینکر کے سمندری بارودی سرنگ سے ٹکرانے اور اس کے نتیجے میں آگ لگنے سے متعلق ایرانی حکام کے دعوے کی آزادانہ تصدیق نہیں ہو سکی۔ واقعے کی مزید تفصیلات سامنے آنے کے بعد ہی نقصان اور اس کے ممکنہ اثرات کا تعین کیا جا سکے گا۔
